Праздничная Минея (на цсл., гражданский шрифт, с ударениями) - [99]

Ты́, о Богома́ти, немощству́ющия препоясу́еши си́лою, а́лчущия насыща́еши; посети́ и мою́ не́мощь и а́лчущаго и жа́ждущаго мене́ насы́ти Живо́тнаго Хле́ба, чрез Твою́ де́вственную утро́бу сше́дшаго с небесе́ на зе́млю.

Слава: Возста́ви, Влады́чице, от земли́ мене́, убо́гаго, и от гно́ища грехо́внаго воздви́гни, ни́щаго, да́ждь моли́тву мне́, моля́щемуся, да, велича́я, пою́ Твое́ заступле́ние.

И ныне: Непло́дствующий мо́й у́м плодоно́сен покажи́, Блага́я Де́во, от непло́дове ро́ждшаяся: Ты́ бо плодоно́сие все́х бла́г явле́нием ико́ны Твоея́ подае́ши.

Катавасия: Твоя́ песносло́вцы, Богоро́дице, / живы́й и незави́стный Исто́чниче, / ли́к Себе́ совоку́пльшия, духо́вно утверди́, / в Боже́ственней па́мяти Твое́й / венце́в сла́вы сподо́би.

Седа́лен Богородицы: Све́тлое дне́сь Засту́пницы на́шея наста́ торжество́. Да взыгра́ется тва́рь, да ликовству́ют челове́честии собо́ри, созыва́ет бо на́с Свята́я Богоро́дица ви́дети огнено́сную ико́ну Свою́, луча́ми ми́лости ве́рныя просвеща́ющую. Те́мже, ра́дующеся, вопие́м: спаси́, Госпоже́, от гла́да, огня́, меча́ и бе́д вся́ почита́ющия явле́ние ико́ны Твоея́.

Сла́ва, и ны́не,то́йже.

Пе́снь 4

Ирмо́с: Ты́ моя́ кре́пость, Го́споди, Ты́ моя́ и си́ла, Ты́ мо́й Бо́г, Ты́ мое́ ра́дование, не оста́вль не́дра Отча, и на́шу нищету́ посети́в. Те́м с проро́ком Авваку́мом зову́ Ти: си́ле Твое́й сла́ва, Человеколю́бче.

Припев: Пресвята́я Богоро́дице, спаси́ нас.

Покры́ небеса́ доброде́тель Твоя́, Богома́ти, и хвалы́ Твоея́ испо́лнися земля́, но положи́ любо́вь держа́вную кре́пости Твоея́ и на мне́, отча́янном.

Уготовля́ющи ше́ствие чу́дней ико́не Твое́й, даде́ бе́здна гла́с сво́й, воздви́жеся со́лнце, и сия́ние ея́ я́ко све́т бы́сть, но Ты́ изшла́ еси́ на спасе́ние люде́й, спасти́ Твое́ насле́дие пришла́ еси́.

Слава: Услы́шавше слу́х прише́ствия Твоего́, и́ноцы убоя́шася; уразуме́вше же дела́ Твоя́, ужасо́шася, но внегда́ смути́тися души́ мое́й, ми́лость Твою́ помяни́, Влады́чице, да взыва́ю: сла́ва заступле́нию Твоему́, Богома́ти.

И ныне: Ты́ еси́ моя́ кре́пость и си́ла, Богоро́дице, Тобо́ю почи́ю в де́нь ско́рби моея́, и из страны́ прише́льствия взы́ду Тобо́ю в небе́сное насле́дие, и возра́дуюся о Го́споде и Бо́зе, Спа́се мое́м.

Катавасия: Седя́й в славе/ на Престо́ле Божества́,/ во о́блаце ле́гце,/ прии́де Иису́с Пребоже́ственный/ нетле́нною дла́нию/ и спасе́ зову́щия:// сла́ва, Христе́, силе Твое́й.

Пе́снь 5

Ирмо́с: Вску́ю мя́ отри́нул еси́ от лица́ Твоего́, Све́те незаходи́мый, и покры́ла мя́ е́сть чужда́я тма́ окая́ннаго? Но обрати́ мя, и к све́ту за́поведей Твои́х пути́ моя́ напра́ви, молю́ся.

Припев: Пресвята́я Богоро́дице, спаси́ нас.

Ви́ждь, Чи́стая, от но́щи у́тренюющия лю́ди па́ствы Твоея́, ико́ну Твою́ богохва́льную обстоя́щия, разреше́ния же грехо́в прося́щия, и жития́ исправле́ния, и Боже́ственныя сла́вы прича́стия: не отри́ни у́бо на́с от лица́ Твоего́, Све́та незаходи́маго Ма́ти.

Все́ю душе́ю и мы́слию в па́стве Твое́й вси́ слику́юще, псалмы́, и пе́сньми духо́вными, и пе́нием боже́ственным ико́ну Твою́ почита́ют, проще́ния грехо́в прося́ще и ду́ш спасе́ния. Ты́ же, исцеле́ние на́ше су́щи, сия́ вся́ пода́ждь, Влады́чице Богоневе́сто.

Слава: Хра́м Тво́й, Де́во, я́ко ра́й други́й показа́ся ны́не, я́ко дре́во жи́зни име́я ико́ну красоты́ Твоея́, ю́же вси́ усе́рдно со благогове́нием и любо́вию целу́юще, взыва́ем: Влады́чице, ми́р да́ждь на́м; Влады́чице, стяжи́ на́с, ино́го бо ра́зве Тебе́ утеше́ния не ве́мы.

И ныне: Реку́ Тя́ сла́дкую и пото́к насыще́ния, ма́нну небе́сную, изоби́лие и благода́ть приснотеку́щую во оби́тели Твое́й живу́щии стяжа́вше, пою́т Рождество́ Твое́, Отрокови́це.

Катавасия: Ужасо́шася вся́ческая / о честне́м успе́нии Твое́м: / Ты́ бо, неискусобра́чная Де́во, / от земли́ преста́вилася еси́ к ве́чным оби́телем, / и к безконе́чней жи́зни, / все́м, воспева́ющим Тя́, / спасе́ние подава́ющая.

Пе́снь 6

Ирмо́с: Очи́сти мя́, Спа́се, мно́га бо беззако́ния моя́, и из глубины́ зо́л возведи́, молю́ся, к Тебе́ бо возопи́х, и услы́ши мя́, Бо́же спасе́ния моего́.

Припев: Пресвята́я Богоро́дице, спаси́ нас.

В ско́рби се́рдца вопию́ Ти, Влады́чице, жите́йскаго мо́ря потопля́емь бу́рею, к Тебе́, я́ко ти́хому приста́нищу, прибега́ю: возведи́ от тли́ живо́т мо́й.

Бе́здна после́дняя грехо́в обы́де мя́, и исчеза́ет ду́х мо́й, но простри́, Влады́чице, высо́кую Твою́ мы́шцу, и я́ко Гаврии́ла, и мене́, ко Твое́й ико́не прибега́юща, невреди́ма сотвори́.

Слава: Не отри́ни мене́ до конца́ от лица́ Твоего́, Ма́ти незаходи́маго Све́та, не попусти́ мне́ погря́знути в пучи́не беззако́ний, но возведи́ мене́ от бла́та страсте́й, да взы́дет из нетле́ния живо́т мо́й, и пожру́ Тебе́ со гла́сом хвале́ния и испове́дания.

И ныне: Хра́м нося́й теле́сный ве́сь оскверне́н, Тебе́, пречи́стому хра́му Ве́чнаго Сло́ва, дерза́ю в честне́м хра́ме Твое́м, пред Твое́ю свято́ю ико́ною приноси́ти смире́нныя моя́ моли́твы. Ты́ же, я́ко ми́лостивая, очи́сти мя́ Твои́м благоутро́бием.

Катавасия: Боже́ственное сие́ и всечестно́е / соверша́юще пра́зднество, / богому́дрии, Богома́тере, / прииди́те, рука́ми воспле́щим, / от Нея́ ро́ждшагося Бо́га сла́вим.