Праздничная Минея (на цсл., гражданский шрифт, с ударениями) - [558]

Ин. Ирмос: Из пла́мене преподо́бным ро́су источи́л еси́, / и пра́веднаго же́ртву водо́ю попали́л еси́: / вся бо твори́ши, Христе́, то́кмо е́же хоте́ти. / Тя превозно́сим во вся ве́ки.

Припе́в: Святы́й равноапо́стольный вели́кий кня́же Влади́мире, моли́ Бо́га о на́с.

От безбо́жных и́долов всех нас изба́вил еси́, / ко Христу́ же Бо́гу приве́л еси́, о́тче, ве́рных князе́й, / наказа́теля стад твои́х, Христа́ пою́щих во ве́ки.

Константи́н новый ты извести́лся еси́ во всей Росси́йстей земли́, блаже́нне Васи́лие: / ты бо и́мя Христо́во изясни́л еси́, / Его́же превозно́сим во ве́ки.

Благослови́м Отца́ и Сы́на и Свята́го Ду́ха, Го́спода.

Царю́ ве́чному ны́не ты предстои́ши и десни́цею Его́ венча́н еси́, / моли́ся Ему́ за недосто́йныя рабы́ твоя́, / я́ко да пое́м Его́ и превозно́сим во ве́ки.

И ныне,Богородичен: О́блак Сло́ва Ты еси́, Препе́тая, и свеща́ со́лнечная, / колесни́ца многоце́нная, деви́ческое возвыше́ние, гора́ ту́чная и усыре́нная, / пребыва́еши Пречи́стая Де́ва Господоимени́тая.

Хва́лим, благослови́м, покланя́емся Го́сподеви,/ пою́ще и превознося́ще во вся ве́ки.

Катавасия: О́троки благочести́выя в пещи́ / Рождество́ Богоро́дичо спасло́ есть, / тогда́ у́бо образу́емое, / ны́не же де́йствуемое, / вселе́нную всю воздвиза́ет пе́ти Тебе́: / Го́спода по́йте дела́ / и превозноси́те Его́ во вся ве́ки.

Песнь 9

Ирмос: Ужасе́ся о сем Не́бо, / и земли́ удиви́шася концы́, / я́ко Бог яви́ся челове́ком пло́тски / и чре́во Твое́ быст простра́ннейшее Небе́с. / Тем Тя, Богоро́дицу, / А́нгелов и челове́к чинонача́лия велича́ют.

Припе́в: Святы́й равноапо́стольный вели́кий кня́же Влади́мире, моли́ Бо́га о на́с.

Дави́д обре́теся пре́жде Изра́илю держа́вный царь и лю́ди спасе́, / бо́ги иноязы́чныя низложи́в, Ду́хом Бо́жия Сы́на пропове́да; / ты же в Тро́ице позна́л еси́ Бо́га, блаже́нне Васи́лие, Его́же велича́ем.

Да торжеству́ют днесь ве́село па́мять твою́ / святоле́пно в це́ркви Бо́жия Ма́тере богоизбра́ннии лю́дие, ю́же любе́зно украси́л еси́, / в па́мять ве́чную твоего́ преставле́ния, не́бо земно́е, / в не́мже почива́я, ожида́еши всестра́шныя трубы́ Арха́нгеловы, блаже́нне. / Тем тя при́сно велича́ем.

Богородичен: Ду́хом Боже́ственным распала́еми, вси ро́ди, любо́вию блажи́м Тя, Богоро́дице: / Ты бо кля́тву прама́тере разруши́ла еси́. / Приле́жно же пое́м Бо́жия Сло́ва, / Того́ бо, неопа́льно во чре́ве Твое́м прие́мши, родила́ еси́ пло́тию. / К Нему́же моли́ся, / изба́витися ве́рному Твоему́ ста́ду от вся́кия ну́жды и печа́ли.

Ин. Ирмос: Бо́га / челове́ком невозмо́жно ви́дети, / на Него́ же не сме́ют чи́ни А́нгельстии взира́ти; / Тобо́ю же, Всечи́стая, яви́ся челове́ком / Сло́во воплоще́нно, / Его́же велича́юще, / с Небе́сными во́и / Тя ублажа́ем.

Припе́в: Святы́й равноапо́стольный вели́кий кня́же Влади́мире, моли́ Бо́га о на́с.

Сла́док, я́коже фи́никс высо́к израща́емь, / и, цвет творя́ ма́сличный, ве́тви многопло́дныя, / ты быва́еши ви́нное израще́ние, ки́сти две созре́лы — му́ченики принося́, / Рома́на и Дави́да честны́я.

Ли́цы князе́й ны́не благоро́дных предстоя́т, / от тебе́ благоче́стие нося́ще, с людьми́ ве́рными хва́ляще тя: / наста́вниче и ско́рый засту́пниче, помина́й всех нас, / я́ко да в ми́ре тобо́ю живо́т обря́щем.

Слава: Лю́дие Росси́йстии, прииди́те, сни́дитеся в честне́й це́ркви Влади́мира свята́го, / нарече́ннаго Васи́лия, преблаже́ннаго вели́каго кня́зя, уго́дника Христо́ва пресла́внаго, / и приими́те живо́т и спасе́ние, благода́ть и ве́лию ми́лость.

И ныне,Богородичен: Бо́га, Де́во, Ты родила́ еси́ на земли́, / во пло́ти соедине́ние бысть Безпло́тное, / во еди́ней Ипоста́си и во двою́ естеству́, / да спасе́т всех нас, кла́няющихся ве́рно, я́ко Богоро́дице Пречи́стей.

Катавасия: Всяк земноро́дный / да взыгра́ется, Ду́хом просвеща́емь, / да торжеству́ет же Безпло́тных умо́в естество́, / почита́ющее свяще́нное торжество́ Богома́тере, / и да вопие́т: / ра́дуйся, Всеблаже́нная, / Богоро́дице Чи́стая Присноде́во.

Светилен. Подобен: Жены́, услы́шите:

Свети́льницы, просвети́вше вселе́нную всю благоче́стием и ве́рою, / вы яви́стеся вои́стинну, боговенча́нне Влади́мире с прама́терию Еле́ною сла́вною. / Вас возлюби́вшаго Христа́ и мы славосло́вим, ди́внаго во святы́х. Дважды.

Слава: В Руси́ днесь учи́тель яви́ся, Христо́ву Правосла́вную ве́ру возлюби́в, / изя́т лю́ди своя́ от тьмы неве́дения и приведе́ ко све́ту Богоразу́мия. / Сего́ ра́ди показа́ся наста́вник и нача́льник Бо́жия благода́ти.

И ныне,Богородичен: Во двою́ во́лю и естеству́, Пренепоро́чная, / во еди́ной же Ипоста́си ражда́еши Бо́га неизрече́нно, / нас ра́ди обнища́вшего до распя́тия хоте́нием / и дарова́вшаго нам бога́тство Боже́ственное, Богома́ти Де́во.

На хвалитех стихиры на 4, глас 4. Подобен: Дал еси́ зна́мение:

Ору́жие кре́пкое / кня́зю на́шему дал еси́, Го́споди, / Крест Твой честны́й, / и́мже поживе́ на земли́ пра́ведно, / просия́в благоче́стием, / и Ца́рству Небе́сному сподо́бися милосе́рдием Твои́м. / Те́мже Твое́ человеколю́бное смотре́ние сла́вим, / Иису́се Всеси́льне, / Спа́се душ на́ших. Дважды.

Дал еси́, Человеколю́бче, / благочести́вому Твоему́ уго́днику / Соломо́нову му́дрость, Дави́дову кро́тость / и апо́стольское правосла́вие, / я́ко царе́й Царь и госпо́дствующих всех Госпо́дь. / Те́мже Твое́ человеколю́бное смотре́ние сла́вим, / Иису́се Всеси́льне, / Спа́се душ на́ших.