Домострой - [8]

ГЛАВА 19[1] КАКО ДЕТИ УЧИТИ И СТРАХОМ СПАСАТИ

Казни сына своего от юности его и покоит тя на старость твою, и даст ти красоту души твоей. И не ослабей бия младенца; аще бо жезлом[2] биеши его, то не умрет, но здравее будет; ты бо бия его по телу, душу его избавляеши от смерти; аще ли дшерь имаши: положи нань грозу свою и блюдеши ея от телесных, да не посрамит лица твоего, да в послушании ходит, да не свою волю приемше[3], и, в неразумии, прокудит девство свое, и сотворит тя знаемым твоим в посмех, и посрамит тя при множестве народа. Аще бо отдаси дщерь свою без порока, то аки велико дело совершляеши, и посреде собора похвалишися и при кончине своей не постонеши нань[4]; а иже любя сына своего, учащай ему раны, да последи о нем возвеселишися. Наказуй его во младости[5], да радуешися о нем в мужестве его, и по среде знаемых[6] похвалишися, и зависть приимут врази твои. Воспитай дети[7] своя с прещением, и обрящеши от них покой и благословение. Не меися игры творя ему: о мале бо ся осклабиши[8], а о велице поболиши скорбя, и последи яко оскомину сотвориши души своей. Не дай же ему власти в юности, но сокруши ребро, донели же растет. Аще еси ожесточав не повинит ти ся; и будет ти оть него досаждение и болезнь души, и тащета домови, и погибель имению и укоризна от сосед, и посмех пред врази и пред властели платеж и досада зла[9]. Аще дети своя воспитаете во страхе Божии, и в поучении, и во всяком наказании, и до совершена возраста сохраниши их во всяком целомудрии, и в чистоте телесной, и законннаго бракосочетания со благословением устроиши, и будут наследницы имению твоему и дому, и всему стяжанию твоему, иже имаши, и упокоят тя на старость твою, и по смерти вечную память сотворят родителеми своим и сами во благословении будут[10] и от Бога великую мзду получат, в сем веце и в будушем, пребывающе в заповедех Господних[11].

ВЕЛИКАГО ВАСИЛИЯ КЕСАРИЙСКАГО ПОУЧЕНИЕ ЮНОШАМ

Душевную бо чистоту имети и безстрастие телесное; ступание кротко; глас умилен; слово благочинно; пищу и питие не мятежно; при старейших молчание; при мудрейших послушание; к преимящим[1] повиновение; к равным себе и меншим любовь имети нелицемерну; от злых и плотских[2] отлучаться; мало вещати, множае разумевати; не предерзывати славом; не избыточествовати беседою; не дерзку быти на смех; стыдением украшатися; к женам нечистым не беседовати; долу зрение имети, горе же душу; бегати сопротивословия немучительски[3] гонити сан; ничтоже вменяти, яже от всех чти; аще кто от вас и инех ползовати, яже от Бога мзду да ожидает, и вечных благ наслаждение.

ГЛАВА 20[1] КАК ДЕТЯМ ОТЦА И МАТЕРЬ БЕРЕЧИ И ПОВИНОВАТИСЯ[2] ИМ ВО ВСЕМ

Чада послушайте заповеди Господня: любити отца своего и матерь свою, и послушайте их, и повинуйтеся им, по Бозе во всем; и старость их чтите и немощь их, и скорбь всякую от всея душа, понесите на своей выи: и благо вам будет, и долголетни будите на земли; сим очистите грехи своя, и от Бога помиловани будете, и от человек прославитеся, и дом ваш будет вовеки, и наследят сыны сынов твоих[3], и достигните старости маститы, во всяком благоденстве дни своя[4] препровождающе[5]. Аще кто злословит, или оскорбляет родителя свои, или клянет и лает, сей пред Богом грешен есть, а от народа и от родитель проклят. Аще кто бьет отца или матерь от церкви Божии и от всякия святыни да отлучатся, и лютою смертию и градскою казнию да умрет; писано бо есть: отча клятва сына потребит, а матерня и искоренит. Сын или дщерь непослушивы отцу и матери, в пагубу себе[6] будут и не поживут дней своих; еже прогневает отца и досажает матери, мнится не согрешая к Богу, и есть поганых горее и обещник[7] нечестивым, о нихже пророк Исайя рече: да возмется нечестивый, да не видит славы Господня[8]; нечестивых именова иже безчествуют родителей своих. И паки рече: насмехающагося отцу, и укоряющаго старость матерню, да склюят и вранове, да снедят и орли; честь же творя отцу и матери и повинуешися им, по Бозе, во всем возвеселится имут о чадех своих и в день печали их избавит их Господь Бог, и молитву их услышит и, его же просят, подаст им вся благая; покояи матерь свою, волю Божию творит, угождая отцу, во благих поживет; вы же чада делом и словом угождайте родителем своим во всяком блазе совете; да благословение будет от них; отче благословение дом утвердит, а матерня молитва от напасти избавит. Аще оскудеют разумом в старости отец и мати, не безчествуете их, ни ударяйте[9], да от своих чад почтени будете. Не забывайте труда матерня и отцова яже о вас болезноваша и печални быша; покойте старость их и о них болезнуйте якоже они о вас. Не глаголи много им[10] сотворихом[11] добра одеянием и пищею и всякими потребами, но неси свободь[12] сим: не можете бо ею родити, и тако ею болети, яко они о тебе. Тем же со страхом, раболепно служите им, да и сами мзду от Бога приимете, и жизнь вечную наследите, яко совершители заповеди его.

ГЛАВА 21[1] ПОХВАЛА МУЖЕМ[2]

Аще дарует Бог кому жену добру дрожайши есть камения многоценнаго; таковая от добры корысти не лишится, делает мужу своему все благо житие. Обретши волну и лен, творить[3] благопотребная[4] руками своима; бысть яко корабль куплю деющ, из далеча сбирает все[5] богатство; и возстает из нощи дает брашно душу и дело рабыням; от плода руку своею насадит стяжание много; препоясавши крепко чресла своя, утвердит мышца своя на дело; и чад своих научает, такоже и рабынь[6]; и не угасает светилник ея во всю нощь; руце своя прастирает на полезная; локти же своя простирает на веретено; милость же простирает убогу; плод же подает нищим; непечется о дому своем муж ея; многоразличная одеяния и преукрашенна сотворить мужу своему, и себе же, и чадам, и домочадцем своим[7]; и сядет и знаемым велми честен будет[8]; и благоразумно беседует[9] и разумеет яко добро делати; никто ж бо без труда венчан будет. Жены ради добры блажен есть муж и число днии его сугубо[10]; жена добра часть блага в части боящихся Бога[11] да будет; жена бо своего мужа честне творяща, первее: Божиею заповедь совершив и сохранив, благословена будешь, а второе: от человек хвалима есть; жена добра, и страдолюбива[12] и молчалива венец есть мужу своему; обретыи[13] бо муж жену свою добру, износит из дому своего благая. Блажен есть таковыя жены муж: и лета своя исполняет в долзе мире. О доброй жене хвала мужу и честь[14]; добрая жена по смерти мужа своего спасет.