Праздничная Минея (на цсл., гражданский шрифт, с ударениями) - [81]

Припев: Пресвята́я Богоро́дице, спаси́ нас.

Неиспи́санная мно́гими проро́ки, / несве́дома же бысть, Де́во, Небе́сными служа́щими Бо́гу А́нгелы; / ны́не же вси ве́мы Тя Богоро́дицу, / и Твоея́ тре́буем по́мощи и заступле́ния, Благослове́нная.

Гора́, усыре́нная Ду́хом, / ю́же Авваку́м ви́де точа́щу ве́рным целе́бную сла́дость, Богоро́дице Де́во, / исцели́ ны, Сы́ну Твоему́ вопию́щия: / благослове́н Бог оте́ц на́ших.

Слава: Преклони́вый Небеса́ в Тя, Де́во, всели́ся / и ны́не на моли́тву Твою́ зрит, Богоро́дице Чи́стая, Твое́, Цари́це, исполня́я проше́ние: / Ему́же за ны усе́рдно помоли́ся, на Тя бо наде́емся, Благослове́нная.

И ныне: Тво́рче, Спа́се наш, Христе́ Бо́же, приими́ моли́тву Твоея́ Ма́тере, / ю́же Тебе́ за ны, гре́шныя, прино́сит, / да Тебе́, ра́дующеся, пое́м: / препе́тый оте́ц на́ших Бо́же, благослове́н еси́.

Катавасия, ирмос тойже.

Песнь 8

Ирмос: О́троки благочести́выя в пещи́ / Рождество́ Богоро́дично спасло́ есть, / тогда́ у́бо образу́емое, / ны́не же де́йствуемое, / вселе́нную всю воздвиза́ет пе́ти Тебе́: / Го́спода по́йте дела́ / и превозноси́те Его́ во вся ве́ки.

Припев: Пресвята́я Богоро́дице, спаси́ нас.

С чи́нми А́нгел, Влады́чице, / с честны́ми и сла́вными проро́ки, с верхо́вными апо́столы, и со священному́ченики, и со архиере́и за ны, гре́шныя, Бо́гу помоли́ся, / Твоего́ Покро́ва пра́здник в Росси́йстей земли́ просла́вльшия.

Горды́ню и шата́ния низложи́ и сове́ты непра́ведных разори́, / зачина́ющих ра́ти погуби́, о Бо́жия Ма́ти, Цари́це Всечестна́я, / и правосла́вных рог возвы́си, да Твой пра́здник сла́вим, Пречи́стая Богоро́дице Де́во, зову́ще: / Го́спода воспева́йте дела́ и превозноси́те Его́ во вся ве́ки.

Благослови́м Отца́ и Сы́на и Свята́го Ду́ха, Го́спода.

Усты́ принося́ще Тебе́ пе́ние, и душе́ю ве́рно покланя́емся, / и́бо внутрь сердца́ на́ша горя́т. / Ма́ти Бо́жия Пречи́стая, поми́луй нас, моля́щихся Тебе́, и Го́спода воспева́ющих, / и превознося́щих Его́ во вся ве́ки.

И ныне: Мно́гими отягчи́хся грехи́, недоуме́ю по достоя́нию написа́ти Твоего́ Покро́ва, Богоро́дице, похвалы́, / но я́ко Ма́ти Бо́жия украси́ Твой пра́здник чудесы́, / да вси, ра́дующеся, пое́м Го́спода и превозно́сим Его́ во вся ве́ки.

Хва́лим, благослови́м, покланя́емся Го́сподеви,/ пою́ще и превознося́ще во вся ве́ки.

Катавасия, ирмос тойже.

Песнь 9

Ирмос: Всяк земноро́дный / да взыгра́ется, Ду́хом просвеща́емь, / да торжеству́ет же Безпло́тных умо́в естество́, / почита́ющее свяще́нное торжество́ Богома́тере, / и да вопие́т: / ра́дуйся, Всеблаже́нная, / Богоро́дице Чи́стая Присноде́во.

Припев: Пресвята́я Богоро́дице, спаси́ нас.

Высо́кий Царю́, со Отце́м седя́й и от Серафи́м воспева́емый, / при́зри на моли́тву Ма́терню, ю́же Тебе́ за ны, гре́шныя, прино́сит, / и очи́сти грехи́ на́ша, спаси́ град, и лю́ди умно́жи, / даждь нам здра́вие телесе́ и на пога́ныя побе́ды, моли́твами Ро́ждшия Тя.

А́нгельский глас вопие́м Тебе́, Де́во Богоизбра́нная: / ра́дуйся, я́же Ада́ма па́ки в рай вве́дшая; / ра́дуйся, де́моны прогоня́щи Твои́м и́менем; / ра́дуйся, наде́жде христиа́н; / ра́дуйся, освяще́ние душ; / ра́дуйся, Храни́тельнице гра́да на́шего.

Слава: Помяни́ нас во Твоих моли́твах, Госпоже́ Де́во Богоро́дице, / да не поги́бнем за умноже́ние грехо́в на́ших. / Покры́й нас от вся́каго зла и лю́тых напа́стей: / на Тя бо упова́ем и, Твоего́ Покро́ва пра́здник че́ствующе, Тя велича́ем.

И ныне:Дар от Бо́га прия́ла еси́ я́ко Ма́ти Бо́жия / всех христиа́н неду́ги исцеля́ти, / и от бед избавля́ти, и грехи́ отпуща́ти, / и от плене́ния спаса́ти и вся́кия ну́жды. / Но и нас не пре́зри, Госпоже́: ве́си бо, и́хже тре́буем, / здра́вия телесе́м и душа́м спасе́ния.

Катавасия, ирмос тойже.

Светилен. Подобен: Жены́, услы́шите:

О Пресвята́я Госпоже́, Де́во Богоро́дице! / Покры́й нас чуде́сным Твои́м омофо́ром, / сохраня́я град и лю́ди от вся́каго зла, / я́коже Тя пречу́дный Андре́й ви́де во Влахе́рнстей це́ркви моля́щуюся; / и ны́не нам, Госпоже́, посли́ вели́кую Твою́ ми́лость. Трижды.

На хвалитех стихиры на 4, глас 8. Подобен: О пресла́внаго чудесе́:

Тебе́ припа́даем, Госпоже́, / уми́льно кла́няющеся, мо́лим Тя: / ра́дуйся, Богоблаже́нная Влады́чице, / многоимени́тая Де́во, / проро́ки проображе́нная че́стно: / в Тя бо, я́ко роса́, Христо́с Бог сни́де, / и родила́ еси́, Браконеиску́сная Чи́стая, и на руку́ носи́ла еси́ всех Творца́ и Го́спода. / Ему́же ны́не о нас моли́ся, / сла́вящих ве́рно Твоего́ Покро́ва пра́здник. Дважды.

Пою́т Тя, Де́во Богоро́дице, А́нгельстии чи́ни, / и сла́вят патриа́рси со архиере́и / и святи́и апо́столи, / я́ко Ма́тери Бо́жии че́стно слу́жат Тебе́, / ви́дяще Тя за мíр моли́тву творя́щую / ко Спа́су всех, Христу́ Бо́гу. / Ему́же помоли́ся изба́вити град и лю́ди, / сла́вящия Тя ве́рно / и Твоего́ Покро́ва пра́здник че́ствующия.

Па́че Ааро́ня киво́та / всю Тя Бог освяти́ / Ду́хом, Богоро́дице, Святы́м, / и па́че со́лнечных луч / Твои́м светя́щимся омофо́ром / освеща́еши Це́рковь и лю́ди / и тьму грехо́в на́ших отгоня́еши, / избавля́еши же от бед и скорбе́й / ве́рою че́ствующия Твоего́ честна́го Покро́ва пра́здник.

Слава, и ныне,глас 6: Я́ко ви́де Тя пречу́дный Андре́й на возду́се / со Арха́нгельским мно́жеством, / со апо́столы, и проро́ки, / и мно́жеством му́чеников, / Сы́ну Твоему́ и Бо́гу на́шему о гра́де и лю́дех моля́щуюся, Влады́чице, / и честны́м Твои́м Покро́вом покрыва́ющую, / не оскуде́й и ны́не, Пречи́стая, / спасти́ изря́дное достоя́ние Твоего́ Сы́на, / пречестны́й пра́здник Твой пра́зднующе, Многопе́тая.