Праздничная Минея (на цсл., гражданский шрифт, с ударениями) - [597]

И ныне,Богоро́дичен: Де́вы чре́во — стог, я́коже на гумне́, вои́стинну яви́ся,/ клас неде́ланен иму́щи, и́мже пита́ется вся́кое естество́, зову́щее:/ Всеси́льне, сла́ва, Христе́, си́ле Твое́й.

Катавасия: Седя́й в Сла́ве / на Престо́ле Божества́ / во о́блаце ле́гце, / прии́де Иису́с Пребоже́ственный, / Нетле́нною Дла́нию / и спасе́ зову́щия: / сла́ва, Христе́, си́ле Твое́й.

Песнь 5

Ирмо́с: Нечести́вии не у́зрят сла́вы Твоея́, Христе́,/ но мы Тя, Единоро́дне,/ Оте́ческия Сла́вы Сия́ние Божества́,/ от но́щи у́тренююще,/ воспева́ем Тя, Человеколю́бче.

Припев: Свята́я прáведная ма́ти Áнно, моли́ Бо́га о на́с.

Не́бо родила́ еси́ на земли́ вои́стинну, ро́ждшую Небесе́ Творца́,/ днесь тя преставля́юща к Небе́сным со сла́вою, А́нно пресла́вная.

С невеще́ственными чи́нми невеще́ственным умо́м лику́еши ра́достно,/ исполня́ема сия́ния Богатода́вца,/ но нас помина́й, ве́рою хва́лящих тя.

Слава: От ко́рене Иессе́ева прозя́бшая я́ве,/ благоцвету́щий жезл, Чи́стую, израсти́ла еси́, сла́вная,/ израсти́вшую цвет неувяда́ющий, Иису́са, Изба́вителя на́шего.

И ныне,Богоро́дичен: К Тебе́ прибега́ю еди́ней держа́вней, ве́рных покро́ву,/ на Тя наде́жду возлага́ю спасе́ния моего́,/ Пресвята́я Влады́чице Богоро́дице, не пре́зри мене́.

Катавасия: Ужасо́шася вся́ческая / о Боже́ственней сла́ве Твое́й: / Ты бо, Неискусобра́чная Де́во, / име́ла еси́ во утро́бе над все́ми Бо́га / и родила́ еси́ Безле́тнаго Сы́на, / всем воспева́ющим Тя / мир подава́ющая.

Песнь 6

Ирмо́с: Пожру́ Ти со гла́сом хвале́ния, Го́споди,/ Це́рковь вопие́т Ти,/ от бесо́вския кро́ве очи́щшися/ ра́ди ми́лости от ребр Твои́х/ исте́кшею Кро́вию.

Припев: Свята́я прáведная ма́ти Áнно, моли́ Бо́га о на́с.

Го́спода Иису́са Бо́га пра́отцы,/ Иоаки́м же и А́нна, пра́вдою укра́шени,/ по достоя́нию в пе́снех да восхва́лятся днесь.

Вся́ческих похва́л А́нна превзы́де,/ я́ко вся́кия похвалы́ превозше́дшую родила́ есть,/ сего́ ра́ди в ли́це пра́ведных водворя́ется.

Светоно́сия и све́тлости испо́лнена па́мять твоя́,/ сия́ния же в мíре спаси́тельная испуща́ющи,/ целому́дренная А́нно, дарова́ний вся́ческих испо́лни.

Слава: Ру́чку, ма́нну Боже́ственную вмести́вшую, во чре́ве носи́ла еси́, А́нно,/ и, с Не́ю ны́не на Небесе́х живу́щи,/ о всех мо́лишися, прехва́льная.

И ныне,Богоро́дичен: От А́нны мíрови роди́лася еси́,/ Цари́це, всех Царя́ ро́ждшая,/ и, де́вствующи по Рождестве́, Херуви́м превы́шши, Пренепоро́чная.

Катавасия: Боже́ственное сие́ и всечестно́е / соверша́юще пра́зднество, / Богому́дрии, Богома́тере, / прииди́те, рука́ми воспле́щим, / от Нея́ ро́ждшагося Бо́га сла́вим.

Конда́к, глас 2. Подо́бен: Вы́шних ища́:

Прароди́телей Христо́вых па́мять пра́зднуем,/ тех ве́рно прося́ще по́мощи/ изба́витися всем от вся́кия ско́рби, зову́щим:/ Бог наш с на́ми, сих прославле́й, я́коже благоволи́.

И́кос: Проро́чески сни́демся вси досто́йно пе́ти прама́тере Христо́вы блаже́нное преставле́ние:/ днесь бо от вре́менныя преста́вися жи́зни,/ на Небесе́х с ра́достию ше́ствие творя́щи, ра́дуется,/ я́ко су́щи ма́ти и́стинныя су́щия Богоро́дицы, и взыва́ет ве́рно:/ вели́чит душа́ моя́ Го́спода, я́ко роди́х Сего́ Ма́терь на земли́,/ И́же Сию́ прославле́й, я́коже благоволи́.

Песнь 7

Ирмо́с: Спасы́й во огни́ авраа́мския Твоя́ о́троки/ и халде́и уби́в,/ я́же Пра́вда пра́ведно уловля́ше,/ препе́тый Го́споди,/ Бо́же оте́ц на́ших благослове́н еси́.

Припев: Свята́я прáведная ма́ти Áнно, моли́ Бо́га о на́с.

Я́ко жи́зни и́стинныя, А́нно, Ма́терь ро́ждши,/ к жи́зни и́стинней преста́вилася еси́ ко све́ту, взыва́ющи:/ препе́тый Го́споди, Бо́же оте́ц на́ших, благослове́н еси́.

И́же Ма́тери Изба́вителя ма́ти су́щи, А́нно,/ от земли́ к Небеси́, доброде́тельми укра́шена, востече́, во хвале́нии зову́щи:/ Бо́же оте́ц на́ших, благослове́н еси́.

К несконча́емей жи́зни, к простра́нней широте́ ра́йския пи́щи,/ к невече́рнему све́ту отшла́ еси́, Богоно́сице, зову́щи:/ Бо́же оте́ц на́ших, благослове́н еси́.

Слава: Испещре́на доброде́тельми, добро́тою Боже́ственных дарова́ний укра́шена,/ к Бо́гу преложи́ся, непреста́нно зову́щи:/ препе́тый Го́споди, Бо́же оте́ц на́ших, благослове́н еси́.

И ныне,Богоро́дичен: Укра́шена добро́тами доброде́телей,/ кра́снаго па́че сыно́в челове́ческих и родила́ еси́ Сло́во, Пренепоро́чная,/ кра́сными ле́потами украша́ющаго Тебе́ песносло́вящих.

Катавасия: Не послужи́ша тва́ри Богому́дрии, / па́че Созда́вшаго, / но о́гненное преще́ние му́жески попра́вше, / ра́довахуся, пою́ще: / препе́тый отце́в Госпо́дь и Бог благослове́н еси́.

Песнь 8

Ирмо́с: О́троки благочести́выя в пещи́/ Рождество́ Богоро́дичо спасло́ есть;/ тогда́ у́бо образу́ емое,/ ны́не же де́йствуемое,/ вселе́нную всю воздвиза́ет пе́ти Тебе́:/ Го́спода по́йте, дела́,/ и превозноси́те Его́ во вся ве́ки.

Припев: Свята́я прáведная ма́ти Áнно, моли́ Бо́га о на́с.

Ма́ти еди́ныя Богоро́дицы, я́же непло́ды пре́жде, ны́не же прама́ти Христо́ва,/ я́коже непло́дства, си́це и ме́ртвости, совле́кши оде́жду, во стране́ живу́щих вопие́т:/ Го́спода по́йте, дела́, и превозноси́те Его́ во вся ве́ки.

Христо́с тебе́ две́ри Вы́шния отве́рзе, ра́достно тя прия́т,/ я́ко дверь родила́ еси́, е́юже Сам про́йде и затворе́ну яви́ по исхожде́нии,/ Богому́драя достойнопе́тая А́нно,/ те́мже тя почита́ем, ве́рнии, во ве́ки.