Праздничная Минея (на цсл., гражданский шрифт, с ударениями) - [573]

Сла́ва, и ны́не: Святы́м Ду́хом / вся́ка душа́ живи́тся, / и чистото́ю возвыша́ется, / светле́ется Тро́ическим Еди́нством священнота́йне.

Проки́мен, глас 4: Честна́ пред Го́сподем / смерть преподо́бных Его́.

Стих: Что возда́м Го́сподеви о всех, я́же воздаде́ ми?

Други́й проки́мен: Вся́кое дыха́ние / да хва́лит Го́спода.

Стих: Хвали́те Бо́га во святы́х Его́, хвали́те Его́ в утверже́нии си́лы Его́.

Ева́нгелие от Матфе́я, зача́ло 43 (Мф 11:27–30).

Рече́ Госпо́дь Свои́м ученико́м: вся Мне предана́ суть Oтце́м Мои́м, и никто́же зна́ет Сы́на, то́кмо Oте́ц: ни Oтца́ кто зна́ет, то́кмо Сын, и ему́же а́ще во́лит Сын откры́ти. Прииди́те ко Мне вси тружда́ющиися и обремене́ннии, и Аз упоко́ю вы. Возми́те и́го Мое́ на себе́, и научи́теся от Мене́, я́ко кро́ток есмь и смире́н се́рдцем, и обря́щете поко́й душа́м ва́шим. И́го бо Мое́ бла́го, и бре́мя Мое́ легко́ есть.

По 50-м псалме́.

Сла́ва: Моли́твами преподо́бнаго Серафи́ма, / Ми́лостиве, очи́сти / мно́жества согреше́ний на́ших.

И ны́не: Моли́твами Богоро́дицы, / Ми́лостиве, очи́сти / мно́жества согреше́ний на́ших.

Та́же, глас 6: Поми́луй мя, Бо́же, / по вели́цей ми́лости Твое́й / и по мно́жеству щедро́т Твои́х / очи́сти беззако́ние мое́.

И стихи́ра, глас 6: Днесь, ве́рнии, духо́вно торжеству́юще / в наро́читем пра́зднице преподо́бнаго отца́ / и благоче́стно ра́дующеся, / тому́ те́пле возопии́м: / ра́дуйся, Серафи́ме блаже́нне; / ра́дуйся, Небе́сный челове́че и земны́й А́нгеле; / ра́дуйся, мно́гих на путь спасе́ния наста́вивый; / ра́дуйся, зе́рным похвало́ и Росси́йстей земли́ утвержде́ние. / Моли́ся о душа́х на́ших.

КАНОН

Кано́н Богоро́дицы со ирмосо́м на 6 (ирмосы́ по два́жды) и преподо́бнаго два кано́на на 8.

Кано́н Пресвяты́я Богоро́дицы, глас 8.

Песнь 1

Ирмо́с: Во́ду проше́д, я́ко су́шу, / и еги́петскаго зла избежáв, / изрáильтянин вопия́ше: / Избáвителю и Бо́гу на́шему пои́м.

Припе́в: Пресвята́я Богоро́дице, спаси́ нас.

Мно́гими содержи́мь напáстьми, / к Тебе́ прибега́ю, спасе́ния иски́й: / о, Мáти Сло́ва и Де́во, / от тя́жких и лю́тых мя спаси́.

Страсте́й мя смущáют прило́зи, / мно́гаго уны́ния испо́лнити мою́ ду́шу; / умири́, Отрокови́це, / тишино́ю Сы́на и Бо́га Твоего́, Всенепоро́чная.

Спáса ро́ждшую Тя и Бо́га, / молю́, Де́во, избáвитися ми лю́тых: / к Тебе́ бо ны́не прибегáя, / простирáю и ду́шу и помышле́ние.

Неду́гующа те́лом и душе́ю, / посеще́ния Боже́ственнаго и промышле́ния от Тебе́ сподо́би, еди́на Богомáти, / я́ко блага́я, Благáго же Роди́тельница.

Кано́н преподо́бнаго Серафи́ма, глас 6.

Ирмо́с: Я́ко по су́ху, пешеше́ствовав Изра́иль / по бе́здне стопа́ми, / гони́теля фарао́на / ви́дя потопля́ема, / Бо́гу побе́дную песнь пои́м, вопия́ше.

Припе́в: Преподо́бне о́тче наш Серафи́ме, моли́ Бо́га о нас.

Го́споди, отве́рзи мои́ недосто́йнеи устне́ и даждь ми сло́во ра́зума / воспе́ти досто́йно па́мять блаже́ннаго Серафи́ма, / ны́не со А́нгелы моля́щагося Тебе́ / изба́вити нас от вса́каго лю́таго обстоя́ния.

К Богоро́дице вели́кий моли́твенник был еси́, преподо́бне, / Ю́же ви́дети со апо́столы сподо́бился еси́, / и ны́не не преста́й моли́твами твои́ми посеща́ти чад твои́х.

От ю́ности твоея́, преподо́бне, преда́лся еси́ умо́м Бо́гови / и, стра́сти теле́сныя кре́пким воздержа́нием укроти́в, / вся́кими доброде́тельми украси́лся еси́, прему́дре.

Богоро́дичен: Всеблага́я Влады́чице, / Я́же Преблага́го Бо́га пло́тию ро́ждши, / озло́бленное страстьми́ мое́ се́рдце очи́сти, / да ве́рою и любо́вию велича́ю Тя.

Ин кано́н преподо́бнаго, глас 8.

Ирмо́с: Во́ду проше́д, я́ко су́шу, / и еги́петскаго зла избежа́в, / изра́ильтянин вопия́ше: / Изба́вителю и Бо́гу на́шему пои́м.

Припе́в: Преподо́бне о́тче наш Серафи́ме, моли́ Бо́га о нас.

По за́поведи Влады́ки Христа́ у́зким и те́сным путе́м вшел еси́, преподо́бне, в Ца́рство Небе́сное, / широ́кий и простра́нный путь возненави́дев, / и ны́не моли́ся о нас, творя́щих пресве́тлую па́мять твою́.

От ю́ности на безстра́стия го́ру возше́д и крест свой взем, / невозвра́тно Христу́ после́довал еси́ / и, духо́вную му́дрость стяжа́в, Го́рняго Иерусали́ма дости́гл еси́, преподо́бне, / моли́ о нас Еди́наго Человеколю́бца.

Слава: Ны́не предстоя́, преподо́бне, Престо́лу Бо́жию, / моли́ся о стране́ на́шей, изба́витися от наше́ствия иноплеме́нных, / и христолюби́вым лю́дем земли́ Росси́йския спасе́ние испроси́ моли́твами твои́ми, преподо́бне.

И ныне,Богоро́дичен: С ве́рою и любо́вию притека́ющих к Тебе́ / и со стра́хом пою́щих Тя / моли́твенный глас услы́ши, Влады́чице.

Катава́сия: Отве́рзу уста́ моя́, / и напо́лнятся Ду́ха, / и сло́во отры́гну Цари́це Ма́тери, / и явлю́ся, све́тло торжеству́я, / и воспою́, ра́дуяся, Тоя́ чудеса́.

Песнь 3

Ирмо́с: Небе́снаго кру́га Верхотво́рче, Го́споди, / и Це́ркве Зижди́телю, / Ты ме́не утверди́ в любви́ Твое́й, / желáний крáю, ве́рных утвержде́ние, / Еди́не Человеколю́бче.

Припе́в: Пресвята́я Богоро́дице, спаси́ нас.

Предстáтельство и покро́в жи́зни моея́ / полагáю Тя, Богороди́тельнице Де́во: / Ты мя окорми́ ко пристáнищу Твоему́, благи́х вино́вна; / ве́рных утвержде́ние, еди́на Всепе́тая.

Молю́, Де́во, душе́вное смуще́ние и печа́ли моея́ бу́рю разори́ти: / Ты бо, Богоневе́стная, / нача́льника тишины́ Христа́ родилá еси́, еди́на Пречи́стая.