Домострой - [17]

ГЛАВА 42[2] В СЕНИЦАХ СЕНО И В КОНЮШНЯХ ЛОШАДИ, И НА ДВОРЕ ЛЕСОВОЙ И ДРОВЯНОЙ ЗАПАС УСТРОИТИ И ВСЯКАЯ ЖИВОТИНА

В сенницах было бы сено устроено, и не изрыто, и не разволочено по сеннице[3], и по крыльцу, и по двору не разстаскано; всегда бы было убрано и подметено, и в ногах[4], и в грязи не затоптано и не накапало бы, и не навияло бы, и не гнило[5]. А солома по томуж былаб в кровле; и прикладено, и убрано, и очищено, а не разволочена[6] б была. А в конюшне дозирати по вся дни, сена класти в ясли, как бы лошадям сести, а вон[7] бы не рыли; а соломка под лошади слати[8]; а на воду бы лошади водити бережно, робята бы на них не гоняли, и вываляти, и вычесати, и на дваре из жолоба овсом кормити; а в лете подкупывати[9] и холодити. А коровам, и гусям, и уткам, и курам, и свиньям, и собаким корм давати, как бы сели; и в хлев солома слати и подгребати; и скот накормя поити и вода ставити. А животине и собакам[10] на то свой суд держати, а чистых судов не поганить. А во всех службах ходити в вечери, и ночью, и утре с фонарем, а в фонаре была бы свеча с огнем, а в конюшне[11], и у соломы отнюдь[12] из фонаря свеща не вынимати, всякия для притчи. А бревна бы[13], и доски, и драницы, и усечки[14] дощаныя, и бревенныя и всякия устроити в стороне, где пригоже, а не на дороге; а бревна, и доски, и драницы были бы на подкладках; а только под кровлею то лутче, чтоб в сухе и не навеяло бы и не намокло. Дрова и щепы, только сухи, ино и топятся хорошо, и сужке приступится[15] хорошо и не угрязнится, ни уваляется.

ГЛАВА 43[1] САМОМУ ГОСУДАРЮ ИЛИ КОМУ ПРИКАЖЕТ ЗАПАС ВСЯКОЙ И ТОВАР КУПИТИ[2]

Самому государю, или кому приказано всегда в торгу смотрети всякаго запасу к домашнему обиходу или хлебнаго всякаго жита, и всякаго обилия[3]: и мяснаго, и рыбнаго, свежаго, и просолу, и масла, и хмелю, и лесовой запас и всякого привознаго товару, который из инных[4] земель идет. Коли чему навоз[5] и чего много и дешево у приезжих людей, и у християн, в те поры и закупай на весь год; ино у рубля четверть сбудется[6], а у десяти рублев потому же, а у закупщика дороже купити; а не в пору купити, ино и двои денги дати, а нелюбое купиш, коли чего нет, а надобе. А которой товар и запас не портится в даль, коли дешево, ино с лишком купити: ино и свой обиход исполнит довольно, а лишное в пору продаст, коли дорого; ино свой обиход прибылью проживет[7]. Так водится у добрых людей и у домовитаго государя[8], своим дозором и добрым наказом[9]. А купит у кого что нибуди, много ли мало ли, у проезжаго ли гостя, или у християнина, или у домашняго торговаго[10] человека[11]полюбовно, а денги платити вдруг[12]. А над тем по человеку, смотря и по купле, и почесть[13] ему учиниш: хлебом и солью и питьем; в том убытка небудет[14], и впредь дружба и знать[15], всегда товару добраго мимо тебя не продаст, и лишняго не возмет и худаго не даст. И за добрую покупку[16] и торговлю, самому государю того гостя или торговаго человека[17] пригоже потчивати[18] и добрым словом приветати, и ласковым приветом; и в таковой доброй дружбе во всем прибыток живет великой. А посмотря по человеку и по торговле, кто чего достоин, подариш его чим, то у тебя сугубо будет. А кто тем путем живет, первое от Бога греха нет, а от людей остуды; а от гостей похвала во всех землях; а в дому все благословенное, и не с клятвою и ясти, и пити, и носити споро, и милостыня из того давати благоприятно Богу, а душе на пользу.

ГЛАВА 44[1] КАК ДВОРОВАЯ ТЯГЛЬ[2] ПЛАТИТИ, ИЛИ С ЛАВКИ ПОЗЕМЬ, ИЛИ С ДЕРЕВНИ ПОДАТЬ И ДОЛЖНИКАМ ДОЛГИ ПЛАТИТИ

Всякому человеку с своего подворья, или с лавки поземь, и с деревни, и со всякаго угодия дани и пошлины[3], и всякие оброки платити, а ни каких государских податей на себе не задерживати, не копити вдруг[4], а платити ранее до сроку; и ты без работы живешь и от сроку, и о поруги денег не дашь, и поминков не носиш и сам не таскаешься. Кто на срок[5] оброков и всяких тяглей не платит, а откупается и тому будет с нужею и две дани[6] вдруг платити, а что носил поминков и сам таскался, то лишное пропало даром. Ино, так не разсудные люди живут; в работе и на правеже; и в долгу до конца обнищает. А кто живет в расправе[7] и всяких податей за собою не задерживает[8]: и тот человек всегда без работы живет и свободен, и при животе в добре, и по смерти ему поминок, дети его останутся с наделком, двор со всем запасом, или лавка с товаром, или деревня со всяким животом, толко ни в кабалах[9], ни в записях[10]. А лучится кому у кого денег заняти[11] или хлеба[12] безкобално, или в кабалу, или на заклад в росты, или без росту, ино б на срок платити, ино впредь добро взяти и люди верят. А кто на срок не платит и росту на предь не уплачивает, ино с убытком и с остудою[13] платити же и впредь никто не верит.

ГЛАВА 45[1] УКАЗ[2] КАК ДЕРЖАТИ[3] ВСЯКОЙ ЗАПАС ПРЕНЕЙ[4] В КАДЕХ, И В БОЧКАХ, И МЕРНИКАХ, И ВО ТЧАНЕХ, И В ВЕДЕРЦАХ: МЯСО И РЫБА, КАПУСТА, ОГУРЦЫ, СЛИВЫ, И ЛИМОНЫ, ИКРА, РЫЖИКИ И ГРУЗДИ

Все бы стояло непочатое[5] и початое в росоле, да пригнетено дощечкою, да и камнем тяжелым. А огурцы, и сливы, и лимоны в росоле же бы были[6] пригнетены решеткою под камешком же легонко; а плеснь всегда счищати[7] и росолом дополнивати, разсолив; а толко который просол не в росоле стоит, ино верхней ряд гниет, а не в брежении, ино и все испортится. А то все[8] в лед всекати; а мясо по времени вывешивати; а в рыбе толко дух появится, ино перемыв вывешивати ж, которая рыба всякая и мясо, солено на провес, и вывешено по[9] весне; и как выветрело, и ясти поспело, ино от остропа[10] сбирати, да переносити пригоже, а иное в стопу класти; и рыба прутовая в рогоже вертети; а пласти по полицам класти; а подпариванная в крошки класти, чтоб ветр проходил; которая как пригоже так держати. А о всем о том: как беречи в начале писано, а в житницах, и, в закромех, и в сушилех всякаго обилия пересматривати, притчею которое: накапало, или навеяло, или сыро, и затхлося, или плесневело, и слеглося, ино[11] разсыпав на сонце пересушити или в печах; а что попортилося ино наперед ести, и в заимы давати, и в милостыню нужным; а только много ино и упрадати, а которое свеже и сухо и в бережении стоит, ино то в даль пустить[12]. А питие всякое: мед, и пиво, и морсы, и вишни в патоки, яблоки[13], и квасы, и брусничная вода, потомуж: кои бочки в леду засечены те держати в полне[14]. Которое питие тронулося, окисло, и поплесневело ино то, по малым сутком ростачивати[15], и то борзее извести; а свежее в даль блюсти, и в полне держати. А яблока, и груши и вишенные[16] ягоды, то бы было в росоле, а плесни счищати и подсытив доливати; и что как пригоже; а на леднике, полное питие и еству[17] в леду[18] держати, ино не портится. А платие всякое, и товар, которые в полатах, и в клетех, и в онбарах, и в лавках, и в сундуках, и в бочках, и в коробях, верхнее и нижнее, и новое, и ветчаное, и дорогое[19] и ущины, и полотна, того всего в лете пересматривати и лежачее платие перетрясывати, и развешивати, и пересушивати в ведряные дни на дворе, а в суморочные в избе; которое попортилося, того починити и ветчанаго поплатити; и опять по старому хорошенко укласти; и держати в суше и в покрыте и за замком. А сено только накапало и навеяло, или сыро, сгнилося[20], или затхлося, ино его в ведряной и в солнечной день на ветр выносити из сенницы и пересушити[21] и перетрясти, да и опять в сенницу скласти; а в стогу толко затхлося или слеглося, ино потомуж сделати[22], а толко попортилося, ино то продати или лошадми травити[23]; да то изводити кое попортилося; а много, ино и спродати; а кое добро и то в даль в зиму блюсти, и в сушу покласти, а сенницы бы были укрыты[24]. А государю, или государыни или кому приказано[25], из утра встав, всего прежде по всему двору у всех хором замков пересмотрити, а где есть печати, только по здорову, ино добро; а где худо замкнуто, или замок испорчен, или незамкнуто, или печати испорчены, или худо запечатано, и в ту хоромину влести и пересмотрити всего. Толко тати были, ино знати или свои крали, или небережением худо замкнуто. И о том по вине смотря и бранити, и наказывати, и обыскивати: где кто ночевал и что деялося; потому и управа чинится. А в вечере потому ж переходити[26]: где бы огня не было и не уронено[27]; да на погребе и на леднике в вечере и утре смотрити бочек гвоздие крепко ли прибито; и не подтекают ли уторами, и ладами; и дном не каплют ли; и везде ли чисто и в росоле, и не плесневело ли[28], и не загноилося ли, и покрыто бы, и перечищено и перебрано. Толко все поздорову и в таком бережении, ино добро; а что не потому, ино, по вине смотря, наказывати по прежеписанному[29]. А двор и хоромы всякие, что обветшанело или попортилося, ино постраивати, и починивати, и крепити или какая порядня земская избылася, також поделывати[30] и было бы в кровле и в суше. Ино тому подворью и всякому обиходу домовитому[31] старости и обветшания нет, – всегда живет в нове. А в избах печи всегда посматривати внутри печи, и на печи, и посторонам и щели замазывати глиною; а под ветшаным[32] кирпичем поплатити, где выломалося. А на печи бы всегда бы было чисто сметено: ино никогда[33] от огня притчи не страх, и плачена[34] хорошо и чего на ней лучится посушити, ино хорошо ж; а у всякия бы печи, над челом был искорник[35] глинян или железен; и хотя низок потолок, ино огня не страх. А всегдаб были всякие хоромы чисто метены и сухи, и не нагрязнены, и не засорены; а на дворе и перед вороты[36] по прежписанному былоб. А метлы и лопаты и всякая порядня по двору не валялась; все бы было прибрано и припрятано. А на дворе и в огороде колодезь бы был; а нет колодезя, ино б вода всегда была; а в лете б вода по хоромам стояла, пожарные ради притчи. Коли избу или мылню топят, ино вода на перед принесена б[37] была, пожарные ради притчи. А вода с реки припасати до утра порану; и дрова потомуж; а почерпати воды из реки или из кладезя, благословляся и судка[38] полоскати в чем вести или нести; а где поставити была б[39] покрыта всегда[40]. А о всем о том наказывати детей и слуг и за доброе устроение и бережение любити и жаловати всячески, а за худое им не гораздо сделано наказание и побои, по вине смотря, доброму бы была честь, а худому гроза.