Блаженная Ксения Петербургская: Жизнь, чудеса, святыни - [27]

Сей кондак чтется трижды, затем паки икос 1-й и кондак 1-й.

Молитвы к святей блаженней Ксении Петербуржстей

Молитва первая

О святая всеблаженная мати Ксение! Под кровом Вышняго жившая, ведомая и укрепляемая благодатию Божиею и предстательством Богоматери, глад и жажду, хлад и зной, поношения и гонения претерпевшая, дар прозорливости и чудотворения от Бога стяжала еси, и под сению Всемогущаго покоишися. Ныне святая Церковь, яко благоуханный цвет, прославляет тя: предстояще на месте погребения твоего, пред образом твоим святым, яко живей ти, сущей с нами, молимся ти: приими прошения наша, и принеси я к престолу милосердаго Отца небеснаго, яко дерзновение к Нему имущая, испроси притекающим к тебе вечное спасение, на благая дела и начинания наша щедрое благословение, от всяких бед и скорбей избавление: предстани святыми твоими молитвами пред Всемилостивым Спасителем нашим о нас, недостойных и грешных: помози, святая блаженная мати Ксение, младенцы светом святаго крещения просветити и печатию дара Духа Святаго запечатлети, отроки и отроковицы в вере, чести и богобоязненности воспитати, и успехи в учении им даровати: болящия и недугующия исцели, семейным любовь и согласие низпосли, монашествующих подвигом добрым подвизатися удостой и от поношений огради, пастыри в крепости Духа Святаго утверди, народ и страну нашу в мире и безмятежии сохрани, о лишенных же в предсмертный час последняго напутствия и без помощи умирающих, умоли Христа причащения святых Христовых тайн им даровати: ты бо наша надежда и упование, скорое услышание и избавление, и тебе благодарение воссылаем, да с тобою славим Отца и Сына и Святаго Духа, Бога, ныне и присно, и во веки веков, аминь.

Молитва вторая

О препрбстая образом жития своего, бездомная на земли, наследнице же обителей Отца небеснаго, блаженная страннице Ксение! Якоже прежде к надгробию твоему недужнии и скорбнии припадавший и абие утешения от тебе улучавший, сице ныне и мы (имена рек), обуреваемии тлетворными обычаи, к тебе прибегающе, с надеждою просим тя: помолися, благая небошественнице, дабы исправилися стопы наша по словеси Господню, к деланию заповедий Его, и да упразднится богоборное безбожие, пленившее град твой и страну нашу, и повергающее нас, многогрешных, в смертное братоненавидение, возбешение и отчаяние. О, блаженнейшая Христа ради страннице, посрамившая мудрость века сего, испроси у Творца и подателя всяческих благ даровати нам дар смирения, кротости и любве в сокровищницу сердца нашего, веры в укрепление молитвы, надежды в покаянии, крепости в многотрудном житии, милосердаго исцеления душ и телес наших, целомудрия в супружестве, и благопопечения о ближних и искренних своих, и всего жития нашего обновления в покаянии, яко да всехвально воспевающе память твою, прославим в тебе чудодействующаго, Отца и Сына и Святаго Духа, Троицу единосущную и нераздельную, во веки веков, аминь.

Молитва третья

О святая преславная блаженная мати наша Ксение, теплая о нас пред Богом молитвеннице, и о немощных и недужных ходатаице: якоже прежде к надгробию твоему припадавший, сице ныне и мы, по прославлении твоем в лице святых, к мощем твоим прибегающе, просим: молися за ны Господу, да освятит души наша и телеса, да просветит ум наш, омраченный помыслы злыми, да очистит совесть нашу от всякия скверны, нечистых, лукавых и хульных помышлений, и от всякаго превозношения, гордости же и кичения, высокоумия же и дерзости, от всякаго фарисейскаго лицемерия, и от всякаго студнаго и лукаваго обычая нашего да избавит ны: и да дарует нам всегдашнее покаяние, сокрушение сердец наших, смиренномудрие, кротость же и любовь, к святыне благоговение, разум же духовный в чтении, с благоразумием и благодарением во всяком деле. Утаившая себе от мудрых века сего, но Богу знаемая, испроси же стране нашей Российстей от бед лютых избавление, и всего нашего жития исправление и обновление о Бозе, соблюди ны и укрепи в исповедании православныя веры христианския, яко да ублажающе тя со всеми праведники, сподобимся и мы, с тобою и со всеми святыми, во вся дни пети, благодарити и славити Отца и Сына и Святаго Духа, Троицу единосущную, животворящую и нераздельную, во веки веков, аминь.

Молитва четвертая

О святая угоднице Божия блаженная Ксение! Призри милостиво оком твоим на нас, раб Божиих (именарек), честней твоей иконе умильно молящихся, и просящих у тебе помощи и заступления: простри ко Господу нашему теплыя молитвы твоя, и испроси душам нашим оставление прегрешений: се бо мы сердцем сокрушенным, и духом смиренным, тебе ходатаицу милостивую ко Владыце и молитвенницу за ны, грешныя, представляем, яко прияла еси от Бога благодать молитися за ны и от бед избавляти: тебе убо просим, не презри нас недостойных, молящихся тебе и твоей помощи требующих, и исходатайствуй всем вся ко спасению полезная, яко да твоими ко Господу Богу молитвами получивши благодать и милость, прославим всех благих источника и дароподателя, Бога единаго, в Троице Святей славимаго, Отца и Сына и Святаго Духа, ныне и присно и во веки веков.

Блаженная Ксения идет по Петербургской стороне