Триодь Постная (на цсл., гражданский шрифт) - [338]

Петр же вне седя́ше во дворе́: и приступи́ к Нему́ еди́на рабы́ня глаго́лющи: и ты бе со Иису́сом Галиле́йским. Он же отве́ржеся пред все́ми, глаго́ля: не вем, что́ глаго́леши. Изше́дшу же ему́ ко врато́м, узре́ его́ друга́я, и глаго́ла им ту: и сей бе со Иису́сом Назоре́ом. И па́ки отве́ржеся с кля́твою: я́ко не зна́ю челове́ка. Пома́ле же приступи́вше стоя́щий, ре́ша Петро́ви: вои́стину и ты от них еси́: и́бо бесе́да твоя́ я́ве тя твори́т. Тогда́ на́чат роти́тися и кля́тися, я́ко не зна́ю челове́ка. И а́бие пе́тел возгла́си́. И помяну́ Петр глаго́л Иису́сов, рече́нный ему́: я́ко пре́жде да́же пе́тел не возгла́си́т, трикра́ты отве́ржешися Мене́. И изше́д вон пла́кася го́рько. У́тру же бы́вшу, сове́т сотвори́ша вси архиере́е и ста́рцы людсти́и на Иису́са, я́ко уби́ти Его́: И связа́вше Его́ ведо́ша, и преда́ша Его́ Понти́йскому Пила́ту иге́мону.

И по чи́ну Боже́ственная литурги́я Вели́каго Васи́лия.

Вме́сто же Херуви́мския пе́сни, пое́м во глас 6:

Ве́чери Твоея́ та́йныя Днесь, Сы́не Бо́жий, прича́стника мя приими́: не бо враго́м Твои́м та́йну пове́м, ни лобза́ния Ти дам я́ко Иу́да, но я́ко разбо́йник испове́даю Тя: помяни́ мя, Го́споди, во Ца́рствии Твое́м. (Два́жды)

По вели́ком же вхо́де повторя́ем: Ве́чери Твоея́ тайныя:

Вме́сто Досто́йно есть: пое́м ирмо́с, глас 6:

Стра́нствия Влады́чня и безсме́ртныя Трапе́зы, на го́рнем ме́сте, высо́кими умы, ве́рнии, прииди́те наслади́мся, возше́дша Сло́ва, от Сло́ва научи́вшеся; Его́же велича́ем.

Вме́сто же прича́стна, пое́тся то́йже тропа́рь: Ве́чери Твоея́ тайныя:

Вме́сто: Да испо́лнятся уста́ на́ша: пое́м то́йже тропа́рь, и аллилу́иа.

По заамвонной же молитве бывает умовение, и его последование, якоже являет Устав. Таже дается антидор, и отпуст. На трапезе же причащаемся вина и елеа.

Отпуст: И́же за превосходя́щую бла́гость путь добре́йший смире́ния показа́вый, внегда́ умы́ти но́ги ученико́в, да́же и до Креста́ и погребе́ния снизше́дый нам, Христо́с, и́стинный Бог наш, моли́твами пречи́стыя Своея́ Ма́тере, святы́х сла́вных и всехва́льных Апо́стол, и́же во святы́х отца́ на́шего Васи́лия Вели́каго, архиепи́скопа Кесари́и Каппадоки́йския, и всех святы́х, поми́лует и спасе́т нас, я́ко Благ и Человеколю́бец.

Служба во Святую и Вели́кую Пятницу

После́дование Ма́лаго повече́рия во Святы́й и Вели́кий четверто́к вечера

Свяще́нник начина́ет: Благослове́н Бог наш, всегда́, ны́не, и при́сно, и во ве́ки веко́в.

Чтец: Ами́нь.

И твори́т после́дование повече́рия по обы́чаю.

По́сле Ве́рую: пое́м трипе́снец господи́на Андре́я Кри́тскаго, глас 8.

Песнь 5

Ирмо́с: Мрак души́ моея́ разжени́, Светода́вче Христе́ Бо́же, началоро́дную тьму изгнав бе́здны, и да́руй ми свет повеле́ний Твои́х, Слове́, да у́тренюя сла́влю Тя. (Два́жды)

При́пев: Сла́ва Тебе́, Бо́же наш, сла́ва Тебе́.

Украси́ся ве́черя, и угото́вася Тебе́ Па́сха, я́коже рекл еси́, Христе́: но Иу́да на преда́ние Твое́ поуча́шеся, и сый с Тобо́ю вне Твоея́ цены́, соглаша́шеся сребролю́бием.

Востае́т с ве́чери, и ле́нтием препоясу́ется по чре́слом Христо́с во́лею, и преклоня́ет вы́ю, Петру́ вопиющу: никогда же мои́ но́зе умы́еши, Тво́рче мой, но оба́че омый.

Прия́т хлеб в ру́це, на преда́ние Иу́да льсти́вый учени́к, и́мже и преда́ние соде́ла Тебе́, простира́ше но́зе, и́хже Сам еси́ омыл, и ле́нтием оте́рл.

Лобза́нием льсти́вным Иу́да тогда́ уста́ распира́ше Тебе́, и́миже Те́ло Твое́, Сло́ве, недосто́йно омака́ше, вопи́я Тебе́, ра́дуйся, учи́телю, лобза́тель и преда́тель, раб и льстец.

Петр, я́коже зря́ше содева́емая тогда́, у́жасом одержи́м быв, рабы́ни обличи́ся худы́м вопроше́нием: и́бо отве́ржеся Тебе́, Го́спода, не то́кмо я́коже рекл еси́, но и я́ко ве́дал еси́, вся ве́дый.

Сла́ва Тебе́, Бо́же наш, сла́ва Тебе́.

Зауша́ется Зижди́тель, и ударя́ется тварь поноше́нием Его́: тро́стию бие́тся хотя́, и вы́шняя преклоня́ются: оплева́ется Судия́, и основа́ния вся земна́я подвиза́ются.

Сла́ва: Те́рнием венчава́ется Бог, зе́млю всю украше́й цветы́, и ра́ны прие́млет, и терпи́т поноше́ние долготерпели́вно, и багряни́цу поруга́ния но́сит, и терпи́т вся Бог сый, и стра́ждет Свое́ю пло́тию.

И ны́не: Да вопие́т Иоа́нн, сказу́я уче́нии боже́ственными воплоше́ние Твое́: Сло́во плоть быв из Де́вы непрело́жно, и пребы́сть естество́м Бог, я́коже бе, не отступи́в оте́ческих Его́ недр.

Та́же ирмо́с о́ба ли́ка вку́пе: Мрак души́ моея́ разжени́, Светода́вче Христе́ Бо́же, началоро́дную тьму изгнав бе́здны, и да́руй ми свет повеле́ний Твои́х, Слове́, да у́тренюя сла́влю Тя.

Песнь 8

Ирмо́с: Покрыва́я вода́ми превы́спренняя Своя́, полага́яй морю преде́л песо́к, и содержа́й вся: Тя пое́т со́лнце, Тя сла́вит луна́, Тебе́ прино́сит песнь вся тварь, я́ко Соде́телю всех во ве́ки. (Два́жды)

Припев: Сла́ва Тебе́, Бо́же наш, сла́ва Тебе́.

Одеваяй о́блаки не́бо, Иису́се, на престо́ле сла́вы ца́рствуя с нетле́нным Отце́м, Ты, прие́м ле́нтий, сим препоя́сался еси́ омы́ти но́ги бре́ннии, весь огнь сый, Сло́ве, а́ще и воплоти́лся еси́.

Я́коже вся омыв, возле́г Иису́с к Свои́м ученико́м глаго́лет: ве́сте вси, что сотвори́х ны́не. Образ бо дах вам смире́ния всем: да и́же хо́щет пе́рвый бы́ти, да бу́дет всех после́дний произволе́нием.