Триодь Постная (на цсл., гражданский шрифт) - [190]

И прочее последование Преждесвященных.

От сего́ же дне́ начина́ет свяще́нник, [или́ диа́кон, а́ще е́сть] двосугу́бая ели́ко оглаше́ния просвеща́емых и моли́тву. Глаго́лются же да́же до Среды́ Вели́кия, кроме́ суббо́т и Неде́ль.

Служба в четверг четвертой седмицы святого Великого поста

Последование Утрени в четверг четвертой седмицы

Тро́ичны гла́са.

По 1-м стихосло́вии глаго́лем седа́льны апо́стольския Oсмогла́сника.

По 2–м же стихосло́вии глаго́лем настоя́щий седа́лен, господи́на Ио́сифа, гла́с 1. Подо́бен: Ли́к а́нгельский:

Си́лою Креста́ утвержда́еми, всю́ ле́сть вра́жию вои́стинну разори́сте апо́столи сла́внии, моли́твенницы ду́ш на́ших. Те́мже дне́сь в поклоне́ние его́ ра́дуетеся, о на́с моля́ще еди́наго Человеколю́бца.

Сла́ва, то́йже.

И ны́не, Богоро́дичен: Мари́е, честно́е Влады́ки прия́телище, возста́ви ны́ па́дшыя в про́пасть лю́таго отча́яния, и прегреше́ний, и скорбе́й: Ты́ бо еси́ гре́шных спасе́ние и по́мощь, и держа́вное предста́тельство, и спаса́еши рабы́ твоя́.

По 3-м стихосло́вии седа́лен, господи́на Фео́дора, гла́с 7. Подо́бен: Го́споди, мы́ есмы́:

Го́споди, Тво́й Кре́ст зря́ще предлежа́щий дне́сь, приступа́ем ве́рно, в пе́ниих и пе́снех, облобыза́юще его́ в стра́се и ра́дости: освяти́ рабы́ Твоя́, умири́ ми́р Тво́й, сего́ явле́нием, еди́не Многоми́лостиве.

Сла́ва, то́йже.

И ны́не, Богоро́дичен. Подо́бен: Го́споди, мы́ есмы́ лю́дие Твои́, и о́вцы па́жити Твоея́, заблу́ждшыя тле́нием, обрати́ на́с: расточе́нныя я́ко Па́стырь собери́ на́с, поми́луй ста́до Твое́ Человеколю́бче, умилосе́рдися моли́твами Богоро́дицы, еди́не безгре́шне.

Кано́н Мине́и, и настоя́щий трипе́снец господи́на Ио́сифа. И стихосло́вится пе́снь. Гла́с 1.

Пе́снь 4.

Ирмо́с: На Боже́ственней стра́жи богоглаго́ливый Авваку́м да ста́нет с на́ми, и пока́жет светоно́сна А́нгела, я́сно глаго́люща: Днесь спасе́ние ми́ру, я́ко воскре́се Христо́с, я́ко всеси́лен.

Освяще́ния пода́тельную благода́ть да́руя на́м святы́й Кре́сте, апо́столом утвержде́ние и похвало́, предлежи́ши в поклоне́ние дне́сь все́й вселе́нней, по́стное вре́мя облегча́я на́м.

Сеннописа́в Кре́ст Моисе́й, распросте́р ру́це, Амали́ка победи́, его́же вообража́юще, ру́це простира́ем, посто́м и мольба́ми, я́ко да полки́ победи́м бесо́вския, борю́щыя на́с всегда́ зави́стно.

Боже́ственным ра́лом Креста́ изъора́сте зе́млю, боже́ственнии ученицы́, плодоно́сну сию́ показа́вше, прозяба́ющую благоче́стие. Те́мже ва́с гла́сы моли́твенными восхваля́юще, Христа́ при́сно сла́вим.

Богоро́дичен: Ма́ти Бо́га блага́го, ублажи́ мою́ ду́шу, ю́же лука́вый обы́чаем злы́м озло́би окая́нно, прельсти́в мя́: да я́ко вину́ спасе́ния, песносло́влю Тя́ при́сно Многопе́тую.

И́н. Гла́с 7.

Ирмо́с: Плотско́е прише́ствие Твое́ Христе́ уверя́я проро́к Авваку́м, взыва́ше: сла́ва си́ле Твое́й Го́споди.

Предлага́ется дне́сь всесвяты́й Кре́ст, присту́пим, целу́им его́: и́бо е́сть ро́г спасе́ния на́шего.

Благода́ть твоя́ и образова́ние твои́м прихо́дит, прогоня́ющи бесо́вское мно́жество, Кре́сте Христо́в, ору́жие необори́мое.

Слава, Тро́ичен: Еди́ницу Тя́ по Естеству́ воспева́ю, Тро́ицу же Ипоста́сьми чту́, О́тче, Сы́не, и Ду́ше Пресвяты́й.

И ныне, Богоро́дичен: Родила́ еси́ Отрокови́це безму́жная Бо́га Всенепоро́чная, содержа́щаго го́рстию концы́, и все́х дре́внейшаго.

Сла́ва Тебе́ Бо́же на́ш, сла́ва Тебе́.

Апо́столи, ми́ра моли́твенницы, моли́те спасти́ся и на́м, содержа́щым ору́жие, Кре́ст Христо́в.

Ирмо́с: Плотско́е прише́ствие Твое́ Христе́ уверя́я проро́к Авваку́м, взыва́ше: сла́ва си́ле Твое́й Го́споди.

Пе́снь 8.

Ирмо́с: Сей нарече́нный и святы́й день, еди́н суббо́т Царь и Госпо́дь, пра́здников пра́здник и торжество́ есть торже́ств, во́ньже благослови́м Христа́ во ве́ки.

Ра́дуйся Кре́сте трича́стный и боже́ственный, на не́мже еди́н от Тро́ицы, пло́ть носи́в водрузи́ся, водруже́нныя ны́ во глубину́ нече́стия избавле́й, превознося́щыя Его́ во ве́ки.

Си́лу держа́вную Кре́ст стяжа́вше, лю́тою вла́стию лука́ваго порабо́тившыяся свободи́ша Сло́ва ученицы́, воспева́юще: Тя́ превозно́сим во ве́ки.

Увы́ мне́, что́ стра́шный престо́л о́ный, на не́мже Сло́ве се́д, соде́янная мно́ю та́йная яви́ши Христе́, облича́яй нечу́вствие мое́? Но естество́м сы́й ми́лостив, пощади́ мя тогда́.

Богоро́дичен: Не́др не отсту́пль Оте́ческих, в не́дрех возле́г еси́ Де́вы, на призва́ние ро́да челове́ческаго, его́же подо́бие, за милосе́рдие Иису́се носи́л еси́. Те́мже Тя́ пое́м челове́цы во ве́ки.

И́ный. Ирмо́с: Еди́наго безнача́льнаго Царя́ сла́вы, Его́же благословя́т небе́сныя си́лы, и трепе́щут чи́ни а́нгельстии, по́йте свяще́нницы, лю́дие превозноси́те Его́ во ве́ки.

Крестоно́сную твою́ седми́цу почита́ем, я́ко поклони́тельную, тебе́ бо Дре́во честно́е, покланя́ющеся вопие́м: по́йте свяще́нницы, лю́дие превозноси́те во вся́ ве́ки.

Оле чудесе́! Царю́ веко́в, я́ко Дре́во, на не́мже распя́лся еси́, сподо́бил ны́ еси́ Твоя́ рабы́ ви́дети, и поклони́тися. Те́мже Тя́ со стра́хом пое́м во ве́ки.

Благослови́м Отца́, и Сы́на, и Свята́го Ду́ха, Го́спода.

Тро́ичен: О единосу́щная, о Тро́ице Всесвята́я, О́тче, Сы́не, и Пресвяты́й Ду́ше, Божество́: неразде́льную Твою́ держа́ву сла́влю, и пою́ еди́но Ца́рство во вся́ ве́ки.