Типикон - [140]

И аще будет время порану, Прилагается чтение дне: емуже чтому, Настоятель раздает свещи братии. Кандиловжигатель же взем благословение у настоятеля, и шед знаменует во вся. И по чтении исходим в притвор, предходящим настоятелю с лампадами, и затворшимся дверем, кадит по чину всю братию, и став пред великими враты церковными, кадит крестообразно трижды, и речет: Слава святей и единосущней: и нам отвещавшим: Аминь. И начинает настоятель тропарь, глас 5: Христос воскресе из мертвых: трижды. Посем поют братия трижды. Настоятель, стих 1: Да воскреснет бог: И братия: Христос воскресе: единожды. Настоятель, стих 2: яко исчезает дым: И братия: Христос воскресе: единожды. Настоятель, стих 3: Тако да погибнут грешницы: И братия: Христос воскресе: единожды. Настоятель, стих 4: Сей день егоже сотвори господь: И братия: Христос воскресе: единожды. И абие настоятель велегласно: Христос воскресе: И отверзшимся вратом входит, предыдущим лампадам, и настоятелю купно и братиям поющим: И сущим во гробех живот даровав. По внегда же внити ему во олтарь, глаголем слава, и поем тропарь праздника, глас 4: Днесь спасения нашего главизна: И ныне, тойже. Таже ектениа великая: Миром господу помолимся: и по возгласе начинает предстоятель ирмос: воскресния день: и поем Канон пасхи, со ирмосом на 8: ирмосы по дважды. И благовещения со ирмосом на 8: ирмосы по дважды: последи же ирмосы обою канонов, кийждо лик свой ирмос: таже катавасиа: воскресния день, оба лика вкупе: и тропарь: Христос воскресе: трижды. И по коейждо песни ектениа малая, и возгласы по чину их. По 3–й песни, кондак и икос пасхи, и впакои, и чтение в богослове: емуже начало: На стражи моей стану: По 6–й песни, кондак и икос праздника благовещения, и чтение в богослове же, емуже начало: воскресния днесь: Таже прокимен праздника, глас 4: благовестите: Стих: Воспойте господеви песнь нову: Всякое дыхание: евангелие луки, зачало 4: Во дни оны воставши мариам: Таже: воскресение христово: трижды. и стихира: воскрес Иисус: трижды, на глас 6. Посем песнь 6–я, и прочия две. На 9 песни поем припевы пасхи, и праздника. Светилен пасхи единожды, и праздника дважды. На хвалитех стихиры воскресны на 4, и благовещения на 4, с припевы их. Таже оба лика вкупе, припев 1: Да воскреснет бог: стихиры пасхи, глас 5, с прочими припевы их. Слава, благовещения, глас 8: Да веселятся небеса: И ныне, пасхи: воскресния день: и целование по обычаю, и поучение златоустаго. ектении, и отпуст. Исхождение же вне монастыря не бывает. Часы же поются но уставу пасхи. На Литургии антифоны пасхи. По входе же глаголем: В церквах благословите Бога, Господа от источник израилевых, Христос воскресе: трижды. Слава, тропарь: Днесь спасения нашего: И ныне, кондак: Аще и во гроб снизшел еси: Вместо трисвятаго поем: елицы во Христа крестистеся: Прокимен, апостол, Аллилуиа и евангелие прежде пасхи, потом праздника.

[Смотри] егда же приспеет На Литургии время чести святое евангелие: И чтет иерей евангелие пасхи со диаконом, якоже указася На Литургии в неделю. Таже чтет евангелие благовещения един диакон по обычаю, якоже и всегда: и к тому евангелию в кандию не ударяют. и по ряду божественная литургиа златоустаго. За Достойно, ирмос пасхи. Причастен пасхи и праздника.

МРК о томже празднице, аще случится благовещение пресвятыя Богородицы в понедельник, во вторник или в среду светлыя недели.

На Велицей Вечерни, по внегда кадити иерею, и рещи ему: Слава, святей и единосущней: поет: Христос воскресе: трижды, и стихи его. Слава, и ныне: Христос воскресе: трижды, таже ектениа. На Господи воззвах, стихиры воскресны 3: и анатолиев 1, и праздника 6, Слава, и ныне, праздника: Послан бысть: Вход, Свете тихий: Прокимен, глас 6: Кто Бог велий, яко Бог наш: со стихи его, и чтений праздника 5. [Аще в неделю вечера: посем иерей: И о сподобитися нам: евангелие Иоанна, зачало 65: Сущу позде в день той: Конец: Не иму веры.] таже, ектениа. На литии стихиры самогласны праздника: Слава, и ныне, благовествует гавриил: На стиховне стихира воскресна едина, таже припев: Да воскреснет бог: и поем стихиры пасхи, с припевы их. Слава, праздника: Днесь радость: И ныне, пасхи: воскресния день: и на конец: Христос воскресе: трижды. Тропарь праздника, трижды, и благословение хлебов, и раздаяние, и чтение праздника. На Утрени, по внегда благословити иерею, и рещи: Христос воскресе: трижды, и стихи его, и по скончании, Слава, тропарь праздника: И ныне, тойже. Таже, ектениа великая, и полиелей, и седален, и чтение праздника. Степенна, 1–й антифон 4–го гласа. Прокимен, и евангелие праздника. воскресение христово: трижды. псалом 50 не глаголем, но абие: Слава: молитвами Богородицы: И ныне, тойже. посем припев на глас 6: благовестите день от дне: и поем стихиру самогласну праздника, глас 6: Послан бысть: таже молитва: спаси Боже люди твоя: и Господи помилуй, 12. и по возгласе, Канон пасхи со ирмосом на 6: и праздника, со ирмосом на 8: ирмосы пасхи и праздника, по дважды. Катавасиа благовещения, ирмос, оба лика вкупе. По 3–й песни, кондак и икос пасхи, и седален праздника. По 6–й песни, кондак и икос праздника, и чтение дне: таже воскрес Иисус: трижды. На 9–й песни припевы пасхи, и праздника. Светилен пасхи единожды, и праздника дважды. На хвалитех стихиры воскресны гласа три: и праздника подобны три. Таже, да воскреснет бог: и поем стихиры пасхи, с припевы их. Слава, праздника: Да веселятся небеса: И ныне, пасхи: воскресния день: Христос воскресе: трижды.] Слава, и ныне: тропарь праздника. ектении, и отпуст. и дается святый елей братии: и бывает литиа вне обители. Часы же поем по обычаю пасхи.