Праздничная Минея (на цсл., гражданский шрифт, с ударениями) - [669]

И ныне,Богородичен: Я́же кля́тву мiрску́ю Боже́ственным рождество́м Твои́м, Чи́стая, потре́бльши, / ста́до, Тебе́ моля́щееся ве́рно, от вся́ких бед изба́ви / моли́твами Твои́ми Отрокови́це.

На хвалитех стихиры на 4, глас 8. Подобен: О, пресла́внаго чудесе́:

О, пресла́внаго чудесе́! / Свяще́нную главу́ и А́нгелом гове́йную / нечи́стая блудни́ца ноша́ше, отрокови́ца, / обличи́вшую дея́ние беззако́нно, / прелюбоде́йце ма́тери принесе́. / О, неизрече́ннаго твоего́ терпе́ния, Человеколю́бче! / И́мже, Христе́, спаси́ ду́ши на́ша, / я́ко еди́н Благоутро́бен. Дважды.

О, И́родова окамене́ния! / Обезче́стивый Бо́га зако́нными преступле́ньми, / кля́твы соблюде́нием ле́стне лицеме́рствует / и к прелюбодея́нию уби́йство прилага́ет, / се́товати творя́йся. / О, неизглаго́ланнаго Твоего́ милосе́рдия, Влады́ко! / И́мже, Христе́, спаси́ ду́ши на́ша, / я́ко еди́н Благоутро́бен.

О, па́че ума́ удивле́ния! / Проро́ков печа́ть, земны́й А́нгел / блу́дному пляса́нию показу́ется цена́, / богосло́вный язы́к, / предпосыла́ется и су́щим во а́де / Христо́в провозве́стник. / О, несказа́ннаго Твоего́ промышле́ния, Влады́ко! / И́мже, Христе́, спаси́ ду́ши на́ша, / я́ко еди́н Благоутро́бен.

Слава,глас 6: Па́ки Ироди́я бе́сится, / па́ки смуща́ется. / О, пляса́ния льсти́вна и пи́ра с ле́стию! / Крести́тель усека́шеся, / и И́род смуща́шеся. / Моли́твами, Го́споди, Твоего́ Предте́чи / мир пода́ждь душа́м на́шим.

И ныне,Богородичен, глас тойже: Богоро́дице, Ты еси́ лоза́ и́стинная, / возрасти́вшая нам Плод живота́, / Тебе́ мо́лимся: / моли́ся, Влады́чице, со святы́ми апо́столы / поми́ловати ду́ши на́ша.

Славословие великое.По Трисвятом тропарь Предтечи:

Па́мять пра́веднаго с похвала́ми, / тебе́ же довле́ет свиде́тельство Госпо́дне, Предте́че: / показа́л бо ся еси́ вои́стинну и проро́ков честне́йший, / я́ко и в струя́х крести́ти сподо́бился еси́ Пропове́даннаго. / Те́мже за и́стину пострада́в, ра́дуяся, / благовести́л еси́ и су́щим во а́де Бо́га, я́вльшагося пло́тию, / взе́млющаго грех мíра / и подаю́щаго нам ве́лию ми́лость.

Слава, и ныне,Богородичен: Вся па́че смы́сла, / вся пресла́вная Твоя́, Богоро́дице, та́инства, / чистоте́ запеча́танной и де́вству храни́му, / Ма́ти позна́лася еси́ нело́жна, / Бо́га ро́ждши И́стиннаго. / Того́ моли́ спасти́ся душа́м на́шим.

Ектении и отпуст.

И дается святый елей братии от кандила святаго Предтечи. И час 1-й. На 1-м часе тропарь и кондак Предтечи. И конечный отпуст.

На литургии

Блаженны от канона 1-го, песнь 3-я на 4, и 2-го, песнь 6-я на 4.

Тропарь Предтечи, глас 2:

Па́мять пра́веднаго с похвала́ми, / тебе́ же довле́ет свиде́тельство Госпо́дне, Предте́че: / показа́л бо ся еси́ вои́стинну и проро́ков честне́йший, / я́ко и в струя́х крести́ти сподо́бился еси́ Пропове́даннаго. / Те́мже за и́стину пострада́в, ра́дуяся, / благовести́л еси́ и су́щим во а́де Бо́га, я́вльшагося пло́тию, / взе́млющаго грех мíра / и подаю́щаго нам ве́лию ми́лость.

Кондак, глас 5:

Предте́чево сла́вное усекнове́ние / смотре́ние бысть не́кое Боже́ственное, / да и су́щим во а́де Спа́сово пропове́сть прише́ствие. / Да рыда́ет у́бо Ироди́я, / беззако́нное уби́йство испроси́вши: / не зако́н бо Бо́жий, ни живы́й век возлюби́, / но притво́рный, привре́менный.

Прокимен, глас 7: Возвесели́тся пра́ведник о Го́споде / и упова́ет на Него́.

Стих: Услы́ши, Бо́же, глас мой, внегда́ моли́ти ми ся к Тебе́.

Дея́ний святы́х Апо́стол чте́ние (Зачало 33. Деян 13:25–32).

Во дни о́ны, я́коже скончава́ше Иоа́нн тече́ние, глаго́лаше: кого́ мя непщу́ете бы́ти, несмь аз, но се гряде́т по мне, Ему́же несмь досто́ин разреши́ти реме́нь сапогу́ Его́. Му́жие, бра́тие, сы́нове ро́да Авраа́мля, и и́же в вас, боя́щиися Бо́га, вам сло́во спасе́ния Сего́ посла́ся: Живу́щии бо во Иерусали́ме и кня́зи их сего́ не разуме́вше, и гла́сы проро́ческия, по вся суббо́ты что́мыя, осуди́вше Его́, испо́лниша. И ни еди́ныя вины́ сме́ртныя обре́тше, проси́ша у Пила́та уби́ти Его́. Я́коже сконча́ша вся, я́же о Нем пи́сана, сне́мше со Дре́ва, положи́ша во гро́бе. Бог же воскреси́ Его́ от ме́ртвых. И́же яви́ся на дни мно́ги совозше́дшим с Ним от Галиле́и во Иерусали́м, и́же ны́не суть свиде́телие Его́ к лю́дем. И мы вам благовеству́ем обетова́ние, бы́вшее ко отце́м, я́ко сие́ Бог испо́лнил есть нам, ча́дом их, воздви́г Иису́са.

Аллилуиа,глас 4.

Стих: Пра́ведник, я́ко фи́никс, процвете́т, я́ко кедр, и́же в Лива́не, умно́жится.

Стих: Насажде́ни в дому́ Госпо́дни во дво́рех до́му Бо́га на́шего процвету́т.

Евангелие от Марка, зачало 24 (Мк 6:14–30).

Во вре́мя о́но, слы́ша И́род царь слух Иису́сов [я́ве бо бысть и́мя его́,] и глаго́лаше, я́ко Иоа́нн Крестя́й от ме́ртвых воста́, и сего́ ра́ди си́лы де́ются о нем. Ини́и глаго́лаху, я́ко Или́я есть, ини́и же глаго́лаху, я́ко проро́к есть, или́ я́ко еди́н от проро́к. Слы́шав же И́род рече́, я́ко, его́же аз усе́кнух Иоа́нна, той есть: той воста́ от ме́ртвых. Той бо И́род посла́в, ят Иоа́нна и связа́ его́ в темни́це, Иродиа́ды ра́ди, жены́ Фили́ппа, бра́та своего́, я́ко ожени́ся е́ю. Глаго́лаше бо Иоа́нн И́родови: не досто́ит тебе́ име́ти жену́ (Фили́ппа), бра́та твоего́. Ироди́я же гне́вашеся на него́ и хотя́ше его́ уби́ти, и не можа́ше. И́род бо боя́шеся Иоа́нна, ве́дый его́ му́жа пра́ведна и свя́та, и соблюда́ше его́, и послу́шав его́, мно́га творя́ше, и в сла́дость его́ послу́шаше. И приклю́чшуся дни потре́бну, егда́ И́род рождеству́ своему́ ве́черю творя́ше, князе́м свои́м, ты́сящником, и старе́йшинам галиле́йским. И вше́дши дщерь тоя́ Иродиа́ды, и пляса́вши, и уго́ждши И́родови и возлежа́щым с ним. Рече́ царь деви́це: проси́ у мене́, е́же а́ще хо́щеши, и дам ти. И кля́тся ей: я́ко а́ще попро́сиши у мене́, дам ти, и до полца́рствия моего́. Она́ же изше́дши рече́ ма́тери свое́й: чесо́ прошу́? Она́ же рече́: главу́ Иоа́нна Крести́теля. И вше́дши а́бие со тща́нием к царю́, проси́, глаго́лющи: хощу́, да ми да́си от него́ на блю́де главу́ Иоа́нна Крести́теля. И приско́рбен быв царь, кля́твы же ра́ди, и за возлежа́щих с ним, не восхоте́ отрещи́ся ея́. И а́бие посла́в царь спекула́тора, повеле́ принести́ главу́ его́. Он же шед усе́кну его́ в темни́це. И принесе́ главу́ его́ на блю́де, и даде́ ю́ деви́це: и деви́ца даде́ ю́ ма́тери свое́й. И слы́шавше ученицы́ его́, приидо́ша и взя́ша труп его́, и положи́ша его́ во гро́бе. И собра́шася апо́столи ко Иису́су, и возвести́ша Ему́ вся, и ели́ка сотвори́ша, и научи́ша.