Праздничная Минея (на цсл., гражданский шрифт, с ударениями) - [637]

В кимва́лех — усты́ чи́стыми, мусики́йски же — се́рдцем све́тлым, / доброгла́сною трубо́ю — высо́кою мы́слию, / Де́вы и Чи́стыя в наро́читый избра́нный день преставле́ния, / де́тельными пле́щуще рука́ми, вопие́м: / препросла́вленный отце́в и наш Бо́же, благослове́н еси́.

Богому́дрии, собери́теся, лю́дие: / Бо́жия бо сла́вы Селе́ние от Сио́на преставля́ется к Небе́сному жили́щу, / иде́же глас чист пра́зднующих, / глас несказа́ннаго ра́дования, и в весе́лии вопию́щих Христу́: / препросла́вленный отце́в и наш Бо́же, благослове́н еси́.

Ин. Ирмос: Не послужи́ша тва́ри Богому́дрии, / па́че Созда́вшаго, / но, о́гненное преще́ние му́жески попра́вше, / ра́довахуся, пою́ще: / препе́тый отце́в Госпо́дь и Бог, благослове́н еси́.

Припев: Пресвята́я Богоро́дице, спаси́ нас.

Ю́ноши и де́вы, Де́выя же и Богома́тере па́мять чту́ще, / ста́рцы, и мона́си, ца́рие и судии́, по́йте: / оте́ц на́ших Го́споди и Бо́же, благослове́н еси́.

Слава: Да востру́бят трубо́ю духо́вною го́ры Небе́сныя, / да ра́дуются хо́лми, и да игра́ют Боже́ственнии апо́столи: / Цари́ца к Сы́ну преставля́ется, с Ним ца́рствующи.

И ныне: Всесвяще́нное преставле́ние Боже́ственныя Твоея́ и Нетле́нныя Ма́тере / премíрныя Вы́шних сил совокупи́ чи́ны, / весели́тися с су́щими на земли́, Тебе́ пою́щими: / Бо́же, благослове́н еси́.

Ирмос 1: Безсту́дней я́рости же и огню́ / Боже́ственное жела́ние сопротивля́яся, / огнь у́бо ороша́ше, / я́рости же смея́шеся, / богодохнове́нною слове́сною преподо́бных тривеща́нною цевни́цею / противовеща́я мусики́йским орга́ном посреди́ пла́мене: / препросла́вленный отце́в и наш Бо́же, благослове́н еси́.

Ирмос 2: Не послужи́ша тва́ри Богому́дрии, / па́че Созда́вшаго, / но, о́гненное преще́ние му́жески попра́вше, / ра́довахуся, пою́ще: / препе́тый отце́в Госпо́дь и Бог, благослове́н еси́.

Песнь 8

Ирмос: Пла́мень, ороша́ющ преподо́бныя, / злочести́выя же попаля́ющ, / А́нгел Бо́жий всемо́щный показа́ отроко́м, / живонача́льный же исто́чник соде́ла Богоро́дицу, / тлю сме́рти и живо́т точа́щу пою́щим: / Соде́теля еди́наго пои́м, изба́вленнии, / и превозно́сим во вся ве́ки.

Припев: Пресвята́я Богоро́дице, спаси́ нас.

Глаго́лы после́доваху Боже́ственному Ковче́гу свяще́нному / все мно́жество Богосло́вов в Сио́не: / ка́мо и́деши ны́не, Ски́ние, — зову́ще, — Бо́га Жива́го? / Не преста́й призира́ющи ве́рою пою́щия: / Соде́теля еди́наго пое́м, изба́вленнии, и превозно́сим во вся ве́ки.

Я́коже, возде́вши ру́це, исхо́диши, Всенепоро́чная, / ру́це, и́миже Бо́га носи́ла еси́ пло́тию, / со дерзнове́нием, я́ко Ма́ти, рекла́ еси́ к Рожде́нному: / я́же Ми дал еси́, во ве́ки сохрани́, вопию́щия Тебе́: / Соде́теля еди́наго пое́м, изба́вленнии, и превозно́сим во вся ве́ки.

Ин. Ирмос: О́троки благочести́выя в пещи́ / Рождество́ Богоро́дично спасло́ есть, / тогда́ у́бо образу́емое, / ны́не же де́йствуемое, / вселе́нную всю воздвиза́ет пе́ти Тебе́: / Го́спода по́йте, дела́, / и превозноси́те Его́ во вся ве́ки.

Припев: Пресвята́я Богоро́дице, спаси́ нас.

Па́мять Твою́, Чи́стая Де́во, / Нача́ла же, и Вла́сти, и Си́лы, А́нгели, Арха́нгели, / Престо́ли, Госпо́дьства, Херуви́ми сла́вят и стра́шнии Серафи́ми; / челове́ческий же род — пое́м и превозно́сим во вся ве́ки.

Благослови́м Отца́ и Сы́на и Свята́го Ду́ха, Го́спода.

И́же стра́нно всели́выйся, Богоро́дице, в чи́стое чре́во Твое́, воплоща́емь, / Сей, всесвяще́нный дух Твой прие́м, / у Себе́ упоко́и, я́ко должни́к Сын. / Те́мже Тя пое́м, Де́во, и превозно́сим во вся ве́ки.

И ныне: О, вы́ше ума́ чуде́с Присноде́вы же и Богома́тере! / Во гроб бо все́льшися, показа́ рай. / Ему́же предстоя́ще днесь, ра́дующеся, пое́м: / Го́спода по́йте, дела́, и превозноси́те Его́ во вся ве́ки.

Хва́лим, благослови́м, покланя́емся Го́сподеви,/ пою́ще и превознося́ще во вся ве́ки.

Ирмос 1: Пла́мень, ороша́ющ преподо́бныя, / злочести́выя же попаля́ющ, / А́нгел Бо́жий всемо́щный показа́ отроко́м, / живонача́льный же исто́чник соде́ла Богоро́дицу, / тлю сме́рти и живо́т точа́щу пою́щим: / Соде́теля еди́наго пои́м, изба́вленнии, / и превозно́сим во вся ве́ки.

Ирмос 2: О́троки благочести́выя в пещи́ / Рождество́ Богоро́дично спасло́ есть, / тогда́ у́бо образу́емое, / ны́не же де́йствуемое, / вселе́нную всю воздвиза́ет пе́ти Тебе́: / Го́спода по́йте, дела́, / и превозноси́те Его́ во вся ве́ки.

На 9-й песни Честне́йшую: не поем, но поем припевы праздника:

Ро́ди вси, блажи́м Тя, / еди́ну Богоро́дицу.

Или: А́нгели, успе́ние Пречи́стыя ви́девше, удиви́шася, / ка́ко Де́вая восхо́дит от земли́ на Не́бо.

Таже ирмос: Побежда́ются естества́ уста́вы: И вторый лик поет тойже припев и ирмос. И на кийждо тропарь поют тойже припев по единожды.

Песнь 9

Ро́ди вси, блажи́м Тя, / еди́ну Богоро́дицу.

Ирмос: Побежда́ются естества́ уста́вы / в Тебе́, Де́во Чи́стая: / де́вствует бо рождество́ и живо́т предобруча́ет смерть; / по рождестве́ Де́ва и по сме́рти жива́, / спаса́еши при́сно, Богоро́дице, насле́дие Твое́.

Ро́ди вси, блажи́м Тя, / еди́ну Богоро́дицу.

Дивля́хуся А́нгельския си́лы, в Сио́не смотря́юще своего́ Влады́ку, / же́нскую ду́шу рука́ми нося́щаго, / пречи́сто бо Ро́ждшей сыноле́пно провозглаша́ше: / гряди́, Чи́стая, с Сы́ном и Бо́гом просла́влена бу́ди.