бог мир. Ино то еретикомь жидовьскаа мудрьствующимь будет дръзость, а христианству будет спона велика. А списавы Зръцало, то яко гаданием положи 7000 лет, глаголя сице: «По домыслу убо реша мнози глаголюще: понеже в 6 дней сътворен бысть мир сей, и скончаваеме убо шестой тысящи быти и скончание миру; слъгаша же тии, рече. Глаголють же пакы друзии, яко понеже есть седморичен настоящий сей век, лепо есть пребыти миру дондеже и седмаа тысяща скончается, яко же Соломон рекл есть: даждь часть убо седмым, и тогда осмому, седмь бо век деланна, осмы же будущаго века образ носить. Но и се речение не благословно ми мнится. И пакы покаряюся, рече, Григорию Богослову глаголющу: егда горний мир наплънится, тогда ожидай скончаниа». А что Шестокрил они себе изучив, да тем прелщают христианство, мня, яко с небесе знамение сводять; ино то не их съставлениа бысть! Шестокрил бо взят от астрономии, яко капля от моря. А то звездозаконие дано бысть Сифу, третиему сыну Адаамову. Да потомь Енох списал праведны дни и часы и лета, и потом Ной последнему роду предаде. Авраам в Египет вшел, египтяна учи землемериа, да и росчет земны. Да потом и жидова от них по тому навыкли. Егда же Филаделфь Птоломей, по Алексаньдре Макидонстем, над Египтом царствова, сей посла ко Азарии, иже тогда в жидовьстей стране пръвосвященнику, избрати от художнейших в разуме, иже закон истлъковати могущих. Архиерей же усмотрив, иже у него искуснейших жидов, иже отечьское и еллинское навыкли беша наказание, и от коегождо племени 70 и два мужей избрал, с радостию посылаеть ко Птоломею. Они же в различных клетех по двема, или по единому разделшеся в Фаре, Александрестемь острове, все божественое писание и сия псалмы, сиречь псалтырю, истлъковавше, и вси в тлъковании съгласиша, яко же дивитися Птоломею. Быть же 70 и двоих сих изложение прежде трею сот и единого лета спасова пришествиа. И оттоле распространилося то преведение в еллиньском языце, и от еллинскаго языка преиде в латынскы язык, за 300 лет до Христова пришествиа. А жидова как распяли Христа, так их в пленение предал бог, да и книги их истреблени бышя. Таже в лета Андриана грецкаго самодрьжца Акила от Синопиа, от еллиньства в христианство преложься, таже в иудейство уклонися, обрадовано жидовом тлъкование изложи. По сем же при Севире, иже от Самариа Симмах еретику Маркиону беседовав, и възвестив самаритом, и сего ради иудейская избрав благодействует им растленны в изложении смысл. По тех же при Комоде цари Феодотион, иже от Ефеса свяшенныя книги зле и разверащение изложи. Нам же священномученик Лукиан, при Диоклитиане мучители, жидовьскыя книги в нашу беседу предлагает, добрее же и твердейте. Мы же таковое[5] изложение почитающе и 70 тих и двоих прилежим паче, яко разно языку преложение сътворшиимь един коегождо разум и беседу издаше. Ино нынешнее жидова еретическое предание дрьжать, псалмы Давыдовы или пророчьства испревращали по тому, как им еретици предали — Акила и Симмах и Феодотион по Христове пришествии и по пленении их, а не яко же нам предали святии апостоли и святии отци тех от мудрых, еже превели жидовьскы закон на еллинскы, за 300 лет преже Христова пришествиа; ино то и достоверно есть, ниже тогда еретици быша. По Христове бо пришествии и по проповеданию святых апостол, сие предание, еже есть 70 тих и двоих преложение, истолковаша святии отци, Давидом реченнаа в псалмех, и еже пророцы глаголаша о Христе. Ино мнит ми ся по Еноху век работает человечьству, а седмь тысящь лет человечьска ради пременениа положена. А по Богуслову и нам на всяк час ждати скончаниа. Да и то ми ся мнит: однова будут еретици у нас украли лет! Занеже у латыны нашего болши осмию леты. Да еще говорят: «У нас, деи, писано седмь тысящ лет да 8 до скончаниа века». И яз их съпросил: «Что ж тлъкуется 8?». И они млъвят: «То, деи, тому слову имя: аще будете добри, придам вам, аще ли будете зли, уйму вас». А татарове сказывают: еще у них до скончаниа миру, сииречь до второго пришествиа христова, 100 лет да два. И се писано: «Седмь век деланья, осмый же будущаго». Ино нам 6 день в недели велено делати, а седмы покой приимати от трудов. И будет однова в нашей паскалии деланиа время не исполнилося, и ты бы о том с Пасеем да с Нилом накрепко поговорил, чтобы есте и ко мне описали о том. Да и о том ми отпиши: мощно ли у мене побывати Паисею да Нилу, о ересех тех было с ними поговорити? Да есть ли у вас в Кирилове, или в Фарофонтове, или на Каменном, книги: Селивестр папа Римскы, да Афанасей Александрейскы, да Слово Козмы прозвитера на новоявлыпуюся ересь на богумилю, да Послание Фотея патриарха ко князю Борису Болгарьскому, да Пророчьства, да Бытия, да Царьства, да Притчи, да Менандр, да Исус Сирахов, да Логика, да Деонисей Арепагит?[6] Зане же те книги у еретиков все есть. Да чтоб еси себе мнения не подръжал. Занеже не нашо дело гнев дръжати. Будет твой сын боярьской невежливо приехал, ино ведь по посольству и ответ дается. И ты ныне задняа забывай, а на предняа простирайся. Где пак будут наши недостаткы, или неведением что будем учинили, и ты бы то нам также простил, яко господень ученик рекшаго: «Аще съгрешит к тебе брат твой, глаголя: каюся, остави ему». Да и о том еще воспоминаю твоему святительству, аще будешь съвершено оставил той великы святительскы сан, хотя смерениа образ въсприят, да не запнеть враг предложениа твоего, преднося помысл кичениа, въспоминаа велико что сътворив. Но паче подобает ти имети помысл всегда уничижен, поминая Закхеем реченнаа «Аще кого чем изобидех, да въздамь четверицею». Сия и законом положена быша. Аще ли речеши: «Несмь обидех никого же», ино от служащих твоих кто будеть изобидел, хотя и тебе неведомо, а отвечати тебе же за то; занеже секира без секущаго не сечеть, сице и слуги наши не могуть никого изъбидети аще не от нас будуть власть прияли. Ползы бо ради сия писах тебе, поминаа рекшаго: друг другом подкрепляем яко град тверд. Да и тебе молим тя, еще что услышишь о наших недостатках, еже будеть зле творимаа нами, такожде писанием възвести нам, а то мне от тебе за великую любовь. А милость господа бога вседержителя, и его пречистыя богоматери и нашего смерениа молитва, купно же и благословение, да есть всегда с твоим святительством и боголюбьем. Аминь. Бывшему архиепископу Ростовьскому и Ярославьскому, Иасафу. В лето 6997 [1489], февраля 23, 24, 25 преписахь сие послание; в грамоте строк девяносто и 5.
