Хрестоматия по истории СССР. Том 1 - [150]

КАКО ДЕТИ УЧИТИ И СТРАХОМ СПАСАТИ

Казни сына своего от юности его, и покоит тя на старость твою, и даст красоту души твоей. И не ослабляй бия младенца: аще бо жезлом биеши его, не умрет, но здравие будет; ты бо, бия его по телу, а душу его избавлявши от смерти. Дщерь ли и маши: положи на них грозу свою, да не посрамиши лица своего, да в послушании ходит;… и посреди собора похвалишися: при концы не постонеши на ню. Любя же сына своего, учащай ему раны, да последи о нем возвеселишися. Казни сына своего измлада и порадуешися о нем в мужестве; и посреди злых похвалишися; и зависть приимут враги твоя. Воспитай детище с прещением, и обрящеши о нем покой и благословение. Не смейся к нему, игры творя: в мале бо ся ослабиши, в велице поболиши, скорбя; и после яко оскомины твориши души твоей. И не даж ему власти во юности, но сокруши ему ребра, донележе растет, а ожесточав, не повинет та ся; и будет ти досажение, и болезнь души, и тщета домови, погибель имению, и укоризна от сусед, и посмех перед враги, перед властью платежи и досада зла…

ПОУЧАТИ МУЖУ СВОЯ ЖЕНА: КАК БОГУ УГОДИТИ, И МУЖУ СВОЕМУ УНОРОВИТИ, И КАКО ДОМ СВОИ ДОБРЕ СТРОИТИ И ВСЯ ДОМАШНЯЯ ПОРЯДНЯ, и РУКОДЕЛЬЕ ВСЯКОЕ ЗНАТЬ И СЛУГ УЧИТЬ И САМОЙ ДЕЛАТЬ

Подобает поучати мужем жен своих с любовью и благоразсудным наказанием; жены мужей своих вопрошают о всяком благочинии: како душу спасти, богу и мужу угодити и дом добре строити; и во всем ему покорятися; и что муж накажет, то с любовью, приимати, и говорити по его наказанию.

Первие: имети страх божий… Востав от ложа своего и молебная совершив, женам и девкам дело указати дневное всякому рукоделию, что работы: дневная ества варити, и которой хлебы печи: ситные и решетные; и сама бы знала как мука сеяти, как квашня притворити и замесити и хлебы валяти и печи, и квасны и бухоны[139] и выпеклися; а колачи и пироги тако же, и колко муки возмут, и колко испекут. И колко чево родится из четверти, или из осмины или из решота, и колко высевок и колко испекут: мера знати во всем; а еству мясную и рыбную, и всякие пироги и всякие блины и всякие каши и кисели, и всякие приспехи печи и варити, все бы сама государыня умела: ино умеет и слуг научити, и все сама знает.

А коли хлебы пекут, тогда и платья моют: ино с одного сьтрепня и дровам не убыточно; и дозирати как красные рубашки моют, и лучшее платья; и колко мыла идет и золы и на колко рубашек; и хорошо бы вымыти и выпарити и начисто выполоскати, и ссушити и искатати и скатерти и убрусы² и ширинки и утиралники такоже; и всему счет самой знати, и отдати и взяти все сполна, и бело и чисто. А ветчано вежливо бы поплачено; ино сироткам пригодитца.

А коли хлебы пекут, ино того же теста велети отняти, и пирогов начинити; а коли пшеничьное пекут и семье из межьситки велети пирогов зделати: в скоромне дни с скоромною начинкою, какая лучится; а в поеные дни с кашею или с горохом, или с соком; или репа, или грибы, или рыжики или капуста: что бог лучит: ино семье потешенье.

И всякую бы еству, и мясную и грубную и всякой приспех скоромной и поеной, жена сама бы знала и умела зделать, и слушку научить. То государыня домовная и домоводицы добрые. И то бы знала же пивной, медовой и винной и бражьной, квасной и уксусной, и кислаштяной и всякой обиход как делают, и поваренной и хлебной; и в чем что родится и колко из чево будет. Коли все знает доброго мужа наказанием и грозою, и своим добрым разумом, ино все будет споро и всево будет много.

А которая женьщина или девка рукодельница, и той дела указати: рубашка делати, или убрус брати и ткати, или золотное или шелковое пяличное дело; и которая чему учена, того всего досмотрити и дозрети и всякой мастери самой; прядено и тафта и камка и золото и серебро отвесити и отмерити, и сметити, и указати сколко чего надобно, и сколко чего даст; и прикроити и примерити; самой все рукоделие знати. А малых девок учити, которая чево пригоже; а мужним женкам, которые черное дело делают, избу топят, и хлебы пякут и платья моют: тем лен дают на себя и на мужа и на дети прясти; а одиная женочка, или девка, на государя лен прядет, а изгребии и пачеси на себя, или как пригоже. А все бы ведала сама государыня, которой дело какое даст, колко чево даст и колко чево возмет; и сколко чего сделает кто днем: много ли мало, и сколко из чево выйдет: то бы сама все знала, и в счете бы было все.

А сама бы государыня, отнюдь никакоже, никоторыми делы, опрично немощи без дела не была, ино и слушкам, на нее смотря повадно делати. Мужь ли придет, гостья ли обычная приидет, всегда бы над рукоделием сидела сама: то ей честь и слава, и мужу похвала: а николи же бы слуги государыни не будили: государыня бы слуг будила. А ложася бы спать всегда от рукоделия молебная совершив.

КАК ИЗБНАЯ ПОРЯДНЯ УСТРОИТИ ХОРОШО И ЧИСТО

Стол и блюда, и ставцы и лошки, и всякие суды и ковши, и братены, воды согрев из утра, перемыти и вытерьти и высушить; а после обеда, такоже, и вечере А ведра, и ночвы, и квашни, и корыта, и сита, и решета, и горшки, и кувшины, и корчаги — та-кож всегды вымыти, и выскресть, и вытереть, и высушить, и положить в чистом месте, где будет пригоже быти; всегда бь всякие суды и всякая порядня, вымыто и чисто бы было; а по лавке и по дьору, и по хоромам, суды не волочилися бы, а ставцы, и блюда, и братены, и ковши, и лошки по лавке не валялися бы, где устроено быти, в чистом месте лежало бы опрокинуто ниц; а в каком судне што: ества или питие, — и то бы покрыто было, чистоты ради; и всякие суды, с ествою или с питием, или с водою, или квашня ростворить, — всегды бы покрыто было, а в избе и повязано, от тороканав и от всякия нечистоты.