Единоверческие молитвы - [12]

Псалом 100.

Милость и суд воспою Тебе, Господи. Пою и разумею в пути непорочне, когда приидеши ко мне? Прехождах в незлобии сердца моего, посреде дому моего. Не предлагах пред очима моима вещь законопреступну, творящия преступление возненавидех. Не прильпе мне сердце лукаво, уклоняющагося от мене лукаваго не познах. Оклеветающаго тай искреняго своего, сего изгонях. Гордым оком и несытым сердцем, с сим не ядях. Очи мои на верныя земли, посаждати их с собою. Ходяи по пути непорочну, сей ми служаше; не живяше посреде дому моего, творяи гордыню. Глаголяи неправедная, не исправляше пред очима моима. Во утрия избивах вся грешныя земли, потребити от града Господня вся делающия беззаконие.

Слава, и ныне. Аллилуия (трижды). Господи помилуй (трижды). Слава, тропарь дню или святому. И ныне, богородичен: Что Тя наречем…

Аще ли же пост, поем на глас 6: Заутра услыши глас мой, Царю мой и Боже мой (трижды), и поклоны три.

Стих. яко к Тебе помолюся, Господи.

Стих. Глаголы моя внуши Господи, разумей звание мое.

Слава, и ныне, богородичен: Что Тя наречем, О! Обрадованная? Небо, яко восияла еси Солнце правде. Рай, яко возрастила еси Цвет нетления. Деву, яко пребыла еси нетленна, Чистая; Матерь, яко имела еси на руку Сына всех Бога. Того моли спастися душам нашим.

Аще ли пост, сия два тропари поем по трижды: Стопы моя направи по словеси Твоему, и да не одолеет ми всяко беззаконие, избави мя от клеветы человеческия, и сохраню заповеди Твоя. Лице Твое просвети на раба Твоего, и научи мя оправданием Твоим.

Да исполнятся уста моя похвалы, яко да воспою славу Твою, весь день велелепоту Твою.

Трисвятое. И по Отче наш, кондак святому, или дневи. Господи помилуй (40).

Таже, молитва Великаго Василия: Иже на всяко время, и на всяк час, на небеси и на земли, покланяемыи и славимыи, Боже Благии, долготерпеливе и многомилостиве; Иже праведники любя и грешных милуя; Иже всех зовыи ко спасению, обещания ради будущих благ; сам Господи, приими молитвы наша в час сий, и в благости исправи живот наш, к заповедем Твоим. Душа наша освяти, и телеса очисти, помышления исправи, и мысли очисти, разум уцеломудри и истрезви, и избави нас от всякия скорби, зол и болезней, и душевных страстей, и огради нас святыми ангелы Твоими, яко да ополчением их соблюдаеми и наставляеми, достигнем во единство веры, и в разум неприкосновенныя Ти славы, яко благословен еси во веки, аминь.

Таже, Господи помилуй (трижды). Слава, и ныне. Честнейшую херувим, и славнейшую воистину серафим, без истления Бога Слова рождьшую, сущую Богородицу Тя величаем (поклон). Именем Господним благослови, отче. За молитв святых отец наших, Господи Исусе Христе, Сыне Божии, помилуй нас. Аминь.

Иерей глаголет: За молитв святых отец наших… И мы глаголем: Аминь. Таже молитва: Христе, Свете истинный… И конечный отпуст.

Аще ли пост, по Отче наш, глаголются тропари сия, глас 4. Скоро предвари, даже не поработимся, врази бо хулят Тя, и претят нам, Христе Боже. Но порази Крестом Своим борющихся с нами, да разумеют, колико может православных вера, молитвами Богородицы, едине Человеколюбче.

Слава. Премудрости наставниче, и смыслу давче, немудрым наказателю, и нищим защитителю, утверди и вразуми сердце мое, Владыко. Ты даждь ми слово, еже отчее единородное Слово: се бо устнама моима не возбраню, еже звати Ти: Милостиве, помилуй мя падшаго.

И ныне. Преславную Христову Матерь, и святых ангел святейшу, немолчно воспоем сердцем и устнами, Богородицу Тя исповедающе, яко воистину рождьшую нам Бога воплощена, и молящуюся непрестанно о душах наших.

Господи помилуй (40). Иже на всяко время… Господи помилуй (трижды). Слава, и ныне. Честнейшую херувим… (поклон великий). Именем Господним благослови, отче. За молитв святых отец наших… Аминь. И творим великия поклоны, с молитвою святаго Ефрема. И прочих 12 метаний. И паки вышеписаную молитву: Господи и Владыко животу моему… всю до конца. И поклон един. Посем, Трисвятое. И по Отче наш, Господи помилуй (12).

И молитва: Христе Свете истинныи, иже просвещая и освещая всякаго человека грядущаго в мир, да знаменается на нас свет лица Твоего Господи, яко да в нем ходяще, узрим свет неприкосновенныя Ти славы, исправи стопы наша, к деланию заповедей Твоих, молитвами Пречистыя Ти Матере, и всех святых Твоих, яко благословен еси во веки, аминь. Таже, обычный отпуст дня того, и настоящаго святаго.

Чин обедницы

По начале Божественныя службы, и по первом возгласе, псаломщик глаголет псалом:

Благослови душе моя Господа.

Егда же во уставе укажет на литургии антифоны празднику, и тогда часы глаголются вси вкупе.

Псалом 102.

Благослови, душе моя, Господа, и вся внутреняя моя имя святое Его. Благослови, душе моя, Господа, и не забывай всех воздаянии Его. Очищающаго вся беззакония твоя, исцеляющаго вся недуги твоя. Избавляющаго от истления живот твой, венчающаго тя милостию и щедротами. Исполняющаго во благих желание твое, обновится яко орлу юность твоя. Творяи милостыню Господь, и судьбу всем обидимым. Сказа пути Своя Моисеови, сыновом израилевым хотения Своя. Щедр и милостив Господь, долготерпелив, и многомилостив. Не до конца прогневается, ни в век враждует. Не по беззаконием нашим сотворил есть нам, ни по грехом нашим воздал есть нам. Яко по высоте небесней от земли, утвердил есть Господь милость Свою на боящихся Его. Елико отстоят востоцы от запад, удалил есть от нас беззакония наша. Яко же щедрит отец сыны, ущедрит Господь боящихся Его. Яко Той позна создание наше, помяну яко персть есмы. Человек, яко трава, дние его, яко цвет сельныи, тако оцветет. Яко дух пройдет в нем и не будет, и не познает к тому места своего. Милость же Господня от века и до века, на боящихся Его. И правда Его на сынех сынов, хранящих завет Его, и помнящих заповеди Его творити я. Господь на небеси уготова престол Свой, и царство Его всеми обладает. Благословите Господа вси ангели Его, сильнии крепостию творящии слово Его, услышати глас словес Его. Благословите Господа вся силы Его, слуги Его, творящии волю Его. Благословите Господа вся дела Его, на всяком месте владычества Его, благослови, душе моя Господа.