Житие Сергия Радонежского - [175]
Повѣда намъ диякъ государевъ Григорий Одинцовъ: Во 152-м году болѣзнующу ми, рече, нутреннею болѣзнию зѣло, и протяжеся сия болѣзнь на много время, яко мнѣти ми в той болѣзни и смерть прияти. И в молитвах своих призывающу ми святаго чюдотворца Сергия, скораго помощника, прося помощи о неисцѣлней своей болѣзни, внезапу же от нѣкоего знаемаго мнѣ от чюдотворцовы Сергиевы обители прислана ко мнѣ просвира и мед чюдотворцовъ Сергиевъ и святая вода. И прием сия с радостию, вкусивъ просвиры и меду и водою болные мѣста покропивъ и молитвами святаго Сергия здравъ бысть. И сего ради, рече, приидох преподобному Сергию помолитися и о чюдеси святаго Сергия чюдотворца возвѣстити. Мы же сия сълышавше, благодаривше Святую Троицу и Пречистую Богородицу и преподобнаго чюдотворца Сергия.
Повѣда намъ инокъ Дионисий, зовомый Бирягинъ: Бывшу ми, рече, в прошлом во 153-м году в нижних градех, иже по рекѣ Волге, и в то время идущу насаду государеву вверхъ рекою Волгою з государевою рыбою, и егда, рече, взыдоша выше града Самары яко до седми поприщъ, и в то время Богъ дарова вѣтръ поносен. И подъемше парусъ, идоша в путь свой и от радости сѣдоша на насаде, мнози же сѣдоша на краех паруса. И внезапу дунув вѣтръ силенъ и удари напрасно в парус, и тѣм парусом сверже с насаду на воду 17 человѣкъ и нача в рекѣ утопати. Прочии же людие, с насаду в малых судѣх елико могуще извлекше их; двум же человѣком от очию тѣх невидимымъ бывшим, мнѣвше утопшим имъ, оставиша их, взыдоша на насад, скорбяше об них и в мертвых вмениша их. Тѣма же носящемася по волнамъ от солнечного всходу мало не до полудне, друг друга видѣвше на водах, но не близ себѣ, яко же послѣди сами сказаша, прочих же никого не видѣвше, от кого б помочь прияти. И вложи имъ Богъ в сердце призывати чюдотворца Сергия на помощъ, яко да избавит их от потопления. И на мнозѣ утомишася от волнения, быша яко мертвии, и нѣкоею силою Божиею обрѣтошася на брѣгу рѣки Волги межу камения велика, лѣжащим безгласным оба приблиз себѣ, ниже града Самары яко пять поприщ. Един же от них видитх инока боголѣпна, сѣда брадою. И рече ему: благодарите Бога, спасшаго вас от потопления. Он же его вопросивъ: кто еси, господи? Святый же рече ему: аз есмь Троицкого монастыря смиренный Сергий. И невидим бысть. Той же яко от сна возбнув, воставъ и сѣде и виде и подруга своего, лѣжаща близ себе[936] еле жива, и поднявъ его, повѣда ему преподобнаго чюдотворца Сергия явление. И помалу от истомления отраду приемше, начаша ходити. Боголюбивии же людие, видѣвше их спасеных от воды, емше и отвезоша их во град Самарский. Ту же бывъ приказщикъ насаду того и взем ихъ на малый свой стругъ, отвезе на свой насад, с него же и спадоша. Видѣвше жевси людие насаду того и слышавше от них, како спасени быша, воскликнуша вси радостными гласы, благодарение Богу воздаша и преподобнаго Сергия чюдотворца ублажиша, спасающаго от бѣдъ и напастей уповающих на него. И дивишася милосердию Божию, яко толико далеко на волнах носими вниз рѣки Волги и спасени быша молитвами святаго Сергия.
В лѣто 7156-го году инокь нѣкий послан бысть ото властей из Сергиевы обители болшого монастыря, Нифонть именем зовомый Кобылинь, и прочии с нимь служебницы на Вологду, в монастырь глаголемый Авнежский, иже под паствою того же болшого монастыря у властей. И егда град Ярославль минув и отьѣхавше неколико поприщь, утру еще глубоку сущу, нападоша на них разбойницы и, связавше ихь, пометаша в снѣгь, а инока того в санях начаша душити треухом его, иже зимняя ради студени на главѣ своей имяше. И уже духь в немь заимашеся, яко же послѣди сам сказавь, и воспомянувь скораго помощника преподобнаго великаго чюдотворца Сергия, и во умѣ своемь моляся преподобному сице: о великий Сергий! виждь, яко погибаю напрасно и ни от кого имѣю помощи; ты же, преподобне, помози ми и избави мя от горкия сея смерти милосердием своим! И в то время отскочиша от него, яко нѣкоею силою Божиею разгнани, топорки и бердыши в руках имуще; один же от них имѣя в руках ножь велий, хотя его проколоти; и много стояще и совѣтующе о немь, и молитвами святаго Сергия защищень бысть от них. Сѣдше разбойницы на их санех, побѣгоша поскору, оставивше его в одной свите, на ногах же чюлки едины оставльше. Той же инок и служебницы, розвязавшеся, идоша вспять, от зимы померзаеми, паки вопиюще, моляхуся преподобному Сергию, да поможет и спасеть безпомощныхь от налѣжащия на них бѣды. И внезапу наѣхаша по них мнози люди, празны сани имущи, и умилосердившеся о них, давше им платие и вземше их к себѣ в сани, и отвезоша в Троицкой Сергиевь монастырь и явиша их пред нами. Они же возвѣстиша нам случшаяся на них и яже о Бозѣ спасение прияша молитвами святаго Сергия. Мы же, слышавше сия, благодаривше Святую Троицу и преподобнаго Сергия скораго помощника.
