Житие Сергия Радонежского - [173]

23. О утопшем, како спасенъ бысть молитвами Святаго

В лѣто 7152-го году, идущу рѣкою Волгою насаду от Астрахани вверхъ, гостя Надѣи Свѣтешникова, приказщикъ же бысть на том насаде имянем Одинецъ. И внегда приидоша противу Казанского устия, внезапу с того насаду свалися человѣкъ в реку Волгу и вскорѣ погрязе, поне же трясовицею одержим бѣ и зѣло немощен. Людие же, иже ту бывшии, возопиша, и нѣцыи от них в малое судно метнувшеся,[928] и поискавше же его, и не обрѣтоша. Мнѣвше его утопша, возвратившеся на болшее судно, иже имянуется насад, его же в то время влекуще конатом, заѣзжающе завознями, яко же обычай есть. Егда же человѣку тому в водѣ погрязшу, яко нѣкоимпромысломъ Божиим воста вѣтръ велий, и на насаде подъяша парус и поидоша в путь свой спѣшно. Человѣкъ же той скорбный, быв на днѣ рѣки, в мысли своей призывая Бога на помощь, и внезапу видит инока свѣтлообразна[929], сединами украшена, и вземъ его за руку, изведе из воды вон и постави его на брезѣ у рѣки на суше. Человѣкъ же той, мнѣвъ его Николу Чюдотворца, тако нарѣкая его. Святый же рече ему: ни, но Троицкого монастыря есмь, Сергий имя мнѣ. Он же, слышав, припаде к преподобныма ногама его, слезами землю омакая; святый же Сергий к тому невидим бысть. И востав человѣкъ той, благодарив Бога и чюдотворца Сергия, спасшаго его от воды, к тому же и от болѣзни здравъ бысть. И от Казани иде пѣшъ, не догнав насаду своего, и прииде в Нижней Новградъ. Насаду же бывшув пристанищи, и у приказщика ярыжные емлюще наемъ свой по уговору. Той же явися приказщику и товарыщем своим; они же, видѣвше его, дивишася, како спасенъ бысть от воды, а вси его видѣвше, како утопе. Он же повѣда нам явление преподобнаго чюдотворца Сергия, яко той изведе его на брегъ, к тому же и от болѣзни исцеление ему дарова. И слышавше вси благодариша Бога и преподобнаго Сергия чюдотворца и совѣтовавше межи себе, даша ему достойнный наем трудов его, глаголюще: Аще, рече, и взятъ бысть вь его мѣсто инъ человѣкъ, но сего ради, рекоша, дати ему: уже[930] изволил Богъ милость свою над нимъ показати и чюдотворцемъ Сергием спасенъ бысть от болѣзни и от воды. А намъ, рече, в то время Богъ за молитвъ преподобнаго Сергия вѣтръ парусный дарова, и мы, идуще на судне, в покое быша и не утрудишася: и то дѣло промысла Божия быти, рекша. Повѣдано же бысть сие чюдо иноком Дионисиемъ, по прозванию Бирягинъ.

24. О околничем, иже, не исправя сердца своего к чюдотворцу Сергию, приехав монастыря считати

В лѣто 7150-го году бысть в Троицком Сергиеве монастырѣ счетъ и изыскание по наносу некоторых не боящихся Бога ту сущих. Счетчиком же имяна суть: околничей Федор Васильевичь Волынской, да дворянин Никита Панин, да дьяки Иванъ Федоров да Дмитрей Прокофьевъ, да подьячих государевых осмь человѣкъ. Пребыша же в монастырѣ у того счетнаго дѣла и до 152-го году. В началѣ же счетнаго дѣла их околничему бысть на властей нелюбие сицевого ради дѣла: Сестра ево родная дала во обитель святаго чюдотворца Сергия отчину свою селцо Вороново, а той братъ ея Федоръ к духовной ея и руку приложил, и утвердишася клятвою страшнаго суда Божия, что быти вотчине их во обители Сергия чюдотворца вѣчно, а роду их никому не выкупити. А будет кто чрез сию клятву роду их дерзнетъ выкупити, и ему дати за тоѣ их вотчину тысящу семьсотъ рублев в домъ Святыя Троицы по них и по их родителех. И околничей Федор, позабыв клятву страшнаго суда Божия, иже сестре своей обѣщася и духовную рукою своею утвердил, нача властем говорити, да продадутъ ему отчину сестрину селцо Вороново. Власти же о семъ смутишася зѣло и глаголаша ему: самъ вѣси, како в духовной сестры твоея написано; мы же, рече, клятвы тоя разрушити не можемъ. Он же разгнѣвася и мочию своею то селцо взялъ и вмѣсто тысящи семисот рублевтолико дал сто пятдесятъ рублев, глаголаше бо: яко дѣтямъ своимъ в прок устрою, имяше бо дву сыновъ у себѣ. И радостен бысть, часто празники творяше, веселяшеся во ядении и в питии, и в сурны, в тимпаны, и в трубы, и по литаврам, яко побѣдныя радостныя игры ликоваху, под стѣною монастыря приблиз[931] Святых ворот. Братия же зѣло зазираше о сем, но глаголати ему не дерзаше настоящаго ради времени. Но Содѣтелю же нашему и Спасу неугодно сия вменися: внезапу нападе на него болѣзнь тяшка зѣло. Едино око остамѣ и бысть недвижимо, и вѣкомъ не закрывашеся, и зрѣние его страшно бысть, и рот искривися. Познав же свое согрѣшение, припадая к чюдотворнымъ мощем Сергия чюдотворца, просит прощенияв дерзости своей и вскорѣ от преподобнаго[932] Сергия приемлет исцелѣние: бысть здрав попрежнему и паки к первому своему счетному дѣлу прилѣжа и любовь ко всѣм показуя не малу. А вотчину за собою удержав, сестры своея приказу не восхотѣ исправити, но и похваляяся, яко бо то дѣлом здѣлалъ, что из монастыря вотчину выкупил, и сестру свою не похваляя, на властей же укорныя рѣчи налагаше почасту. И во мнозе возношении позабывъ в сердцы си разсудити, яко животом и смертию Богъ владѣетъ, и ему же аще хощет, грады и волости даетъ, яко же Ему годѣ есть. И по мале времени суд Божий постиже: сынъ его умре, немедленно же по немъ и другаго смерть восхищаетъ. Той же зѣло оскорбися, по своих дѣтях плача и рыдая, их же чаяв по себѣ наслѣдников и вотчину имъ в прок готовая. Ненадежно обезчадися и у властей о вотчине прощения прося, и яко разъярився на свой нравъ, вотчину продав, взявъ тысящу четыреста рублевъ, обѣщания же сестры своея не восхотѣ исправити. Окамене бо сердце его от скупости, паче же от ярости: вотчины в монастырь не возвративъ и денегъ не давъ, яко ея ради дѣтей избывъ; таков бо нравъ сердитых. И по мале впаде в ту же болѣзнь, прежняго еще лютѣе, яко и глава ему и выя вся извратися на сторону и ротъ изкривися пуще прежнаго, яко и глаголати не могий. И познав свое неисправление пред Сергиемъ чюдотворцемъ и еже преступилклятву сестры своея, и положи на сердцы си, яко всякое добро его и всякое дѣло неугодно чюдотворцемъ показася, покиня счетное дѣло, поѣхалъ к Москве, и со слезами у чюдотворца Сергия милости просит о исцѣлении болѣзни своея. И по малѣ бысть здрав и вскоре приѣхав, припадая у многочюдесных мощей преподобнаго Сергия, благодарение воздая и у властей прощение прося, отходитъ в дом свой. И по малѣ времени отходитъ к оному вѣку и погребен бысть во обители у чюдотворца Сергия.