Триодь Постная (на цсл., гражданский шрифт) - [399]

Владычествуяй безплотными Силами и ведый души моея леностное, Крестом Твоим спаси мя, Христе Боже, яко Человеколюбец.

Слава, и ныне, Крестобогородичен: Распеншагося за ны Христа Бога и разрушившаго смерти державу, непрестанно моли, Богородице Дево, да спасет души наша.

По 6-й песни мученичен:

Мученицы Твои, Господи, врага победиша и прелесть идольскую посрамиша, вооружившеся Крестною силою. Темже и со Ангелы воспевающе зовут победную песнь, славословяще Тя, Христе; теми Тя молим, спаси нас.

ГЛАС 8

В ПОНЕДЕЛЬНИК НА УТРЕНИ, по 1-м стихословии седальны умилительны:

Оком благоутробным, Господи, виждь мое смирение, яко помале жизнь моя иждивается, и от дел несть мне спасения. Сего ради молюся: оком благоутробным, Господи, виждь мое смирение, и спаси мя.

Стих: Господи, да не яростию Твоею обличиши мене, ниже гневом Твоим накажеши мене.

Яко Судий предстоящу, попецыся, душе, и страшнаго дне час помышляй: суд бо немилостив есть не сотворшим милости. Возопий убо Христу Богу: Сердцеведче, согреших, прежде даже не осудиши, помилуй мя.

Слава, и ныне, Богородичен: Мысленная врата жизни, Пречистая Богородице, притекающия Тебе верно избави от бед, да славим пресвятое рождество Твое, во спасение душ наших.

По 6-й песни мученичен:

Светила умная явистеся святии мученицы, мглу бо прелести упразднисте верою, и душевныя свещи ваша просветисте, и с Женихом со славою внидосте в небесный чертог: и ныне молим вы, молитеся спастися душам нашим.

ВО ВТОРНИК НА УТРЕНИ, по 1-м стихословии седальны умилительны:

Яко блудница припадаю Ти, да прииму оставление, и вместо мира, слезы от сердца приношаю Ти, Христе Боже: да яко оную ущедриши мя, Спасе, и подаси очищение грехов. Яко оная бо зову Ти: избави мя от тимения дел моих.

Стих: Господи, да не яростию Твоею обличиши мене, ниже гневом Твоим накажеши мене.

День он страшный помышляющи, душе моя, побди, вжигающи свещу твою, елеем просвещающи: не веси бо когда прийдет к тебе глас глаголющий: се Жених! блюди убо, душе моя, да не воздремлеши, и пребудеши вне толкущи, яко пять дев: но бодренно пожди, да усрящеши Христа елеем маститым, и даст ти чертог Божественный славы Своей.

Слава, и ныне, Богородичен: Недвижимое утверждение веры, и честный дар душ наших, Богородицу песньми величаем вернии: радуйся, камень жизни во чреве Твоем вместившая. Радуйся, концей надеждо, скорбящих заступление. Радуйся, Невесто Неневестная.

По 6-й песни мученичен:

Светом небесным сияет днесь сия скиния: в сей бо воинства ангельская радуются, с нимиже мученичестии лицы веселятся о памяти страстотерпец. Тех молитвами низпосли миру Твоему мир, Христе, и велию милость.

В СРЕДУ НА УТРЕНИ, по 1-м стихословии седальны крестны:

Видя разбойник Начальника жизни, на Кресте висяща, глаголаше: аще не бы Бог был воплощься, Иже с нами распныйся, не бы солнце лучи своя потаило, ниже бы земля трепещущи тряслася: но вся терпяй, помяни мя, Господи, во Царствии Твоем.

Стих: Возносите Господа Бога нашего, и покланяйтеся подножию ногу Его, яко свято есть.

Посреде двою разбойнику мерило праведное обретеся Крест Твой: овому убо низводиму во ад тяготою хуления: другому же легчащуся от прегрешений к познанию богословия: Христе Боже, слава Тебе.

Слава, и ныне, Крестобогородичен: Агнца и Пастыря, и Спаса мира, на Кресте зрящи, рождшая Тя глаголаше слезящи: мир убо радуется, приемля избавление, утроба же Моя горит, зрящи Твое распятие, еже за всех терпиши, Сыне и Боже Мой.

По 6-й песни мученичен:

Теснаго и скорбнаго пути неуклоннии путешественницы бысте, святии мученицы: искушений бо волнение претерпесте, и безплотных слуг жительство восприясте, камень терпения, и основания благочестия показастеся, молите Христа Бога о душах наших.

В ЧЕТВЕРГ НА УТРЕНИ, по 1-м стихословии седальны апостольстии:

Благословен еси, Христе Боже наш, Иже премудры ловцы явлей, низпослав им Духа Святаго и теми уловлей вселенную; Человеколюбче, слава Тебе.

Стих:Во всю землю изыде вещание их, и в концы вселенныя глаголы их.

Светила мира и наставники, нашего спасения начаток, божественныя воспоим ученики Бога нашего, яко свет сущим во тьме нам возсияша и Солнце славы всем сказаша; темже и прелесть идольскую низложиша, Троицу проповедавше во Едином Божестве. Сего ради молимся, апостоли Христа Бога, прегрешений оставлению дароватися празднующим любовию святую память вашу.

Слава, и ныне, Богородичен: Радуйся, Ангелом Радость мира приемшая, радуйся, рождшая Творца Твоего и Господа, радуйся, сподобльшаяся быти Мати Божия.

По 6-й песни мученичен:

Доблественне течение совершивше, мучителем сопротивистеся мученицы; телеса бо умертвивше на земли, восприясте небесную жизнь святии.

В ПЯТНИЦУ НА УТРЕНИ, по 1-м стихословии седальны крестны:

Посреде Едема древо процвете смерть, посреде же всея земли Древо прозябе жизнь: вкусивше бо перваго, нетленни суще, тленни быхом, получивше же втораго, нетления насладихомся; Крестом бо спасаеши, яко Бог, род человеческий.

Стих: Возносите Господа Бога нашего, и покланяйтеся подножию ногу Его, яко свято есть.

В раи убо прежде древом обнажи, о вкушении враг нанося умерщвление; Креста же Древо живота одеяние человеком нося наведе на земли, и мир весь исполнися всякия радости. Егоже видяще возвышаема, Богу в вере, людие, согласно воззовем: исполнь храм славы Его.