Триодь Постная (на цсл., гражданский шрифт) - [113]

Сотвори́ держа́ву мы́шцею Свое́ю, расточи́ го́рдыя мы́слию се́рдца их.

Низложи́ си́льныя со престо́л и вознесе́ смире́нныя, а́лчущия испо́лни благ и богатя́щияся отпусти́ тщи.

Восприя́т Изра́иля о́трока Своего́, помяну́ти ми́лости, я́коже глаго́ла ко отце́м на́шим, Авраа́му и се́мени его да́же до ве́ка.

Песнь 9

Лик поет ирмос канона храма. (Дважды)

Стих: Благослове́н Госпо́дь Бог Изра́илев, я́ко посети́ и сотвори́ избавле́ние лю́дем Свои́м.

И чтется тропарь канона храма.

Стих: И воздви́же рог спасе́ния нам, в дому́ Дави́дове о́трока Своего́.

И тропарь канона храма.

Стих: Я́коже глаго́ла усты́ святы́х, су́щих от ве́ка проро́к Его́, спа́сение от враг на́ших и из руки́ всех ненави́дящих нас.

И тропарь канона храма.

Стих: Сотвори́ти ми́лость со отцы́ на́шими и помяну́ти заве́т святы́й Свой.

И тропарь канона храма.

Стих: Кля́тву, е́юже кля́тся ко Авраа́му отцу́ на́шему, да́ти нам без стра́ха, из руки́ враг на́ших изба́вльшимся.

Зде чтется канон святаго Феодора.

Ирмос: Рождество́ Твое́ нетле́нно яви́ся: Бо́г из боку́ Твое́ю про́йде, я́ко Плотоно́сец яви́ся на земли́ и с челове́ки поживе́. Тя́, Богоро́дице, те́м вси́ велича́ем.

Стека́ется мно́жество отвсю́ду, в сень сведе́ния, и живу́щую благода́ть, предпросия́вшаго в сла́ве всех му́чеников, со Влады́чицею всех велича́ем.

Стих: Служи́ти Ему́ преподо́бием и пра́вдою пред Ним вся дни живота́ на́шего.

Мужа́йся, Христо́ва Це́рковь, и держа́вствуй всу́е борю́щими: Христо́вы бо дру́зи и предстоя́щии о тебе́ пеку́тся, и отстоя́щии я́коже до́блии, ему́же соверша́еши благода́рственная.

Стих: И ты, отроча́, проро́к Вы́шняго нарече́шися, преды́деши бо пред лице́м Госпо́дним угото́вати пути́ Его́.

Возмне́вшася дре́вле умре́ти, ве́щи показу́ют жи́ти и по кончи́не, и ве́ры па́ки предста́тельствовати с ра́вною ре́вностию, е́юже богатя́щеся Благоде́теля велича́ем.

Стих: Да́ти ра́зум спасе́ния лю́дем Его́, во оставле́ние грех их, милосе́рдия ра́ди ми́лости Бо́га на́шего.

Богородичен: Я́ко Боже́ственную Тя печа́ть, пе́сньми запеча́танную Бо́жию кни́гу налага́ю нося́, и собира́ю похвалы́ в Тебе́, Де́во, си́це прославля́я наипа́че Твоего́ му́ченика.

Стих: В ни́хже посети́ нас Восток с высоты́, яви́тися во тьме и се́ни сме́ртней седя́щим.

Иный канон святаго Феодора:

Ирмос: Бо́га челове́ком невозмо́жно ви́дети, на Него́же не сме́ют чи́ни А́нгельстии взира́ти; Тобо́ю бо, Всечи́стая, яви́ся челове́ком Сло́во воплоще́нно, Его́же велича́юще, с Небе́сными во́и Тя ублажа́ем.

До́бре яви́лся еси́ побо́рник, пресла́вне, и держа́вное заступле́ние нам чту́щим твою́ честну́ю и ве́чную па́мять ны́не, и твои́х страда́льчеств исправле́ния, и бы́вшее в нас Боже́ственное заступле́ние.

Стих: Напра́вити но́ги на́ша на путь ми́рен.

Твое́ всеблаже́нне чу́до, Фео́доре, соверше́нное святы́ми ту́чами, пое́тся на весь мир, блаже́нне: те́мже и ле́тно собира́ющеся, сла́ву возсыла́ем Христу́, тебе́ просла́вльшему.

Слава: Зря любо́вь восхваля́ющих тя, му́чениче Христо́в, благода́ть возда́рствуй вя́щшую, и ве́ру ве́дый ели́ка есть, пресла́вне, не преста́й, молйтвенниче тепле́йший му́чениче, и хода́тай к Бо́гу на́шему явля́яся.

И ныне, Богородичен: Пе́ти, Де́во, Тя не престае́м помо́щницу, покро́в, ско́рое заступле́ние, и предста́тельницу нашу непосты́дную: соблюди́ Твоя́ рабы́ вся́каго озлобле́ния, вся́кия ко́зни лука́ваго свобожда́ющи при́сно.

Таже катавасия: Всяк земноро́дный да взыгра́ется ду́хом просвеща́емь, да торжеству́ет же безпло́тных умо́в естество́, почита́ющее свяще́нное торжество́ Богома́тере, и да вопие́т: ра́дуйся, Всеблаже́нная Богоро́дице, Чи́стая Присноде́во.

Посем ектения малая: Па́ки и па́ки:

Ексапостиларий: Подобен: Со ученики́:

Венчено́сче свя́те, предстоя́й со А́нгелы Христо́ву ны́не престо́лу, и све́та отту́ду исполня́яйся страсто́носче, мир ми́рови непреста́нно исхода́тайствуй, и нам спасе́ние, благоче́стно светоно́сную па́мять твою́ соверша́ющим, Фео́доре всебога́те, му́чениче преукраше́нне.

Слава: глаголем тойже.

И ныне: Во чре́ве Твое́м Госпо́дь, погиба́ющий мир от тле́ния призва́ти восхоте́в, я́коже ве́дяше, всели́ся, Богоро́дице. Спасе́ние у́бо вси обре́тше, возопии́м Тебе́ а́нгелово, е́же ра́дуйся, Всепе́тая, во всех жена́х благослове́нная: и́бо ра́дость породила́ есй всей вселе́нней.

Стихологисуем:Хвали́те Го́спода с Небе́с: обычныя псалмы, 3 (148, 149, 150).

И поем святаго стихиры 4, глас 1: Подобен: Небе́сных чино́в:

Му́жа изря́дна вы́шняго воинствосло́вия, ве́рнии, я́ко терпели́ваго ору́жника на́шего благоче́стия, согла́сно соше́дшеся, пе́сньми та́инственными восхва́лим, глаго́люще: досточу́дне му́чениче Иису́сов, моли́ся о чту́щих тя.

Тезоимени́тым твои́м зва́нием, да́ре Бо́жий вои́стинну, скорбя́щим всем утеше́ние пода́лся еси́, Фео́доре треблаже́нне: вся́кий бо к твоему́ прибли́жаяся хра́му вои́стинну, с весе́лием прие́мля воздая́ния чуде́с твои́х, почита́ет Христа́.

Благоче́стия бога́тство, и све́тлость, страда́льческими по́двиги, себе́ сокро́виществовав, всю кре́пость твою́ дар прия́тный Бо́гу прине́сл еси́, исполня́я в по́двизех со тща́нием богодарова́нное твое́ призыва́ние.

Всесве́тлым торжество́м боже́ственнаго му́ченика, напита́имся вси, и ве́рно возвесели́мся, празднолю́бцы, почита́юще све́тлое празднество́ его́ сконча́ния, пе́сненно воспева́юще Иису́са, просла́вившаго па́мять его́.