Типикон - [93]

[Смотри] Ведомо же буди: Аще случится навечерие богоявления, в субботу, или неделю, пост не бывает и тропари царских часов со чтениями в субботу и неделю не поются: но поем часы царския прежде в пяток по обычаю, якоже указано на ряду. Глаголем же символ веры, и псалом 33: благословлю Господа: И отпуст. И в той день ядим сыр и яица. Аще будет навечерие в субботу: Прокимен, Аллилуиа, и причастен дне. Апостол же и евангелие прежде субботе пред богоявлением, и потом ряд. По Изрядно, поем Достойно: Аще ли в неделю навечерие богоявления: Прокимен, апостол, Аллилуиа, евангелие и причастен, прежде недели пред богоявлением, и потом ряд. По Изрядно же, поем, Достойно: По отпущении же литургии ядим укрухи, и пием по единой чаши вина. Совершенно же ядим по отпусте вечерни, со елеем. Сыра же и яиц и рыб никакоже дерзнем коснутися. Аще ли в пяток прежде навечерия богоявления, когда поются часы царския, зри указ, декемвриа в 24–й день.

6. (+) святое богоявление Господа бога и спаса нашего Иисуса Христа.

При часе 5 дне знаменует в великое, и потом во вся тяжкая. И собравшимся в храм начинаем вечерню: и поем обычный псалом. Таже ектениа великая. Аще будет в субботу, стихословим, блажен муж, кафисму всю. Аще же в неделю, поем 1–й антифон. Аще ли во иныя дни, стихологиа не бывает: но абие поем, Господи воззвах, на глас 2. иерей же творит проскомидию. Диакон кадит церковь по обычаю. И мы поем. стихиры праздника на 8, глас 2. Самогласны: Просветителя нашего: Слава, и ныне, глас тойже: Приклонил еси главу: Таже вход со евангелием. Свете тихий: Прокимен дне. Аще ли в субботу на вечерни, прокимен, Господь воцарися: Аще ли на вечерни, в пяток: Прокимен поем великий: Бог наш на небеси и на земли: со стихи его. И чтения праздника, по чину их. Посреде чтения, тропарь со стихи их обычными. По скончании же чтения, ектениа малая. И возглас: яко свят еси Боже наш: И поем трисвятое. Прокимен, глас 3. Господь просвещение мое: Стих: Господь защититель живота моего: Апостол к коринфяном, зачало 143: Свободен сый от всех: Аще ли несть поста, начинаем его от полу: Не хощу вас не ведети: Аллилуиа, глас 6: отрыгну сердце мое слово благо: Стих: Красен добротою паче сынов человеческих. евангелие луки, зачало 9: В пятоенадесяте лето: И по ряду божественная литургиа великаго василиа: Вместо достойно поем: о тебе радуется: Причастен, Хвалите Господа: И по заамвонной молитве, абие исходим вси ко священной купели в притвор, или на источники, царскими враты. Игумен, или старейший иерей, носяй на главе честный крест, предыдущим ему свещеносцем, и диаконом с кадилы, и полагает честный крест на благоукрашенном столе, идеже и воде уготованней в чаше, и свещам окрест стоящим, и даются свещи братиям. Клириком же поющим тропарь, глас 8: Глас господень на водах: трижды. В тоже время настоятель кадит окрест стола, таже образы, и праздника на аналогии, и священников, и лики по чину, предходящу ему диакону со свещею. Посем тропарь, глас тойже: Днесь вод освящается естество: дважды. И другий: яко человек на реку: дважды. Слава, и ныне: Ко гласу вопиющаго: Таже диакон: Премудрость. и чтутся чтения 3: пророчества исаиина. Таже прокимен, глас 3: Господь просвещение мое: Стих: Господь защититель живота моего: Апостол к коринфяном, зачало 143 от полу: Не хощу вас не ведети: Аллилуиа трижды, глас 4: Глас господень на водах: евангелие марка, зачало 2: Прииде Иисус от назарета галилейскаго: И глаголет диакон ектению великую: Миром господу помолимся. и прочее ектении освящения. Сим же от диакона глаголемым, настоятель глаголет молитву тайно: Господи Иисусе Христе, единородный сыне: без возгласа, и речет в себе и Аминь. И начинает велиим гласом, во услышание всех, молитву сию глаголя: Велий еси Господи, и чудна дела твоя: всю до конца, трижды. Таже молитву: Ты бо хотением от не сущих: и прочая. И по скончании молитв, абие благословляя воду крестовидно честным крестом, погружает его право низводя в воду и возводя, держа его обема рукама, поя и настоящий тропарь, во глас 1: Во иордане крещающуся тебе Господи: И в другий такожде знаменует крестом воду, и в третий такожде тойже тропарь поя сам настоятель, споющим ему и прочим священником. Таже по сих поют и лики тойже тропарь. Настоятель же взем священную воду на блюдо, и обратяся на запад лицем, в левой руце держа честный крест, а в правой василки, кропит крестообразно на вся страны. И приходят прежде к настоятелю священницы, два два, и целуют честный крест, и знаменует их василком по лицу со священною водою крестообразно: но тому же чину и вся братия. Поется же тогда тропарь от всех многажды, дондеже освятятся вся братия водным кроплением, и причащением. И абие входим во храм, и поем стихиру. Слава, и ныне, глас 6: Воспоим вернии: Таже, Буди имя господне, трижды. и псалом 33: благословлю Господа на всякое время: Потом дается антидор от иереа, и отпуст. По отпусте же или есть литургиа, или несть, вжигаем свещник посреде церкве, ставше вкупе клирицы, и поют тропарь праздника. Слава, и ныне кондак: и входим в трапезу, и ядим с древяномаслием, испиваем же и вина. Сыра же и подобных ему, рыб никакоже дерзнем ясти, возбранено бо есть божественными правилы. Сице бывает служба постну дню сущу, в навечерии просвещения.