Типикон - [117]

Таже седален, глас 1. По 6–й песни,

Кондак, глас 3. Подобен: дева днесь: Вперився славне господнею любовию, и сего славный крест на рамо взем, посрамил еси диаволи козни: пострадал еси даже до смерти, и истины явился еси победоносец, оружник и таинник божия благодати.

По 9–й песни, светилен мученка.

МРК Подобает ведати, аще прилучится отдание сретения господня прежде недели мытаря и фарисеа в седмице в кийлибо день, кроме недели.

Вечер, по обычной кафисме, на Господи воззвах, стихиры праздника на 6, поемыя на самый праздник. Слава, и ныне, праздника, самогласен. Аще в пяток вечера, Слава, праздника: И ныне, богородичен настоящаго гласа. Прокимен дне, входа и чтения несть. На стиховне стихиры праздника со стихи их. Слава, и ныне, праздника. По трисвятом тропарь праздника. Таже, ектениа и отпуст. На повечерии, по трисвятом, кондак праздника. Полунощницу поем по обычаю с кафисмою и тропари обычными. На Утрени, на Бог господь, тропарь праздника, трижды. По обоих кафисмах, седальны праздника, и чтения. Канон праздника со ирмосом на 14, ирмос по дважды. Катавасиа, тойже ирмос. По 3–й песни, седален праздника, дважды. По 6–й песни, кондак и икос праздника: и чтение в прологе. На 9–й песни, честнейшую не поем, но поем припевы праздника, якоже и на самый праздник. Светилен праздника дважды. На хвалитех стихиры праздника на 4. Слава, и ныне, самогласен праздника. Посем славословие великое. По трисвятом тропарь праздника, единожды. Таже ектении, и отпуст: и обычное исхождение в притвор, и час первый. На часех, тропарь и кондак праздника. На Литургии, блаженна, песнь 9–я, со ирмосом на 6. По входе тропарь праздника. Слава, и ныне, кондак праздника. Прокимен, Аллилуиа, и причастен праздника: апостол и евангелие дне. [Смотри] святаго же прилучившагося службу поем на повечерии, или како настоятель изволит.

МРК Аще ли прилучится отдание праздника сретения господня в неделю, прежде недели мытаря и фарисеа: На Велицей Вечерни, по предначинательном псалме поем, блажен муж, кафисму всю. На Господи воззвах, стихиры воскресны 3, и анатолиев 1, и праздника 6, поемыя на самый праздник. Слава, праздника: И ныне, богородичен 1- й гласа. На литии стихиры праздника. Слава, и ныне, праздника. На стиховне стихиры воскресны. Слава, и ныне, праздника. На благословении хлебов тропарь, Богородице Дево, дважды: и праздника единожды, и чтение в посланиих апостольских. На Утрени, на Бог господь, тропарь воскресн дважды. Слава, и ныне, праздника. По обоих кафисмах седальны воскресны, и богородичны их: и чтение во евангелии толковом, и полиелей, и тропари: Ангельский собор: впакои гласа, и чтение. Степенна, и прокимен гласа. Всякое дыхание: евангелие воскресно, и прочее воскресно и до канона. Канон воскресн со ирмосом на 4: и Богородице на 2: и праздника на 8. Катавасиа праздника, Сушу глубородительную землю: По 3–й песни, кондак и икос праздника: и седален праздника, дважды. По 6–й песни, кондак и икос воскресн: и чтем пролог. На 9–й песни поем честнейшую: Светилен воскресн. Слава, и ныне, праздника. На хвалитех стихиры воскресны 4: и праздника со славным 4, со стихи праздничными. Слава, стихира евангельская: И ныне, Преблагословенна еси Богородице Дево: И славословие великое. По трисвятом тропарь воскресн точию. ектении, и отпуст, и оглашение студитово, и исхождение обычное в притвор, и час первый. На часех, тропарь воскресн. Слава, праздника: И ныне, богородичен часов. По трисвятом кондак праздника, и конечный отпуст. Такожде и на прочих часех глаголем тропари и кондаки. На Литургии, блаженна гласа, на 6: и праздника песнь 9–я, на 4. По входе тропарь воскресн, и праздника. Слава, кондак воскресн: И ныне, кондак праздника. Прокимен гласа, и праздника. Апостол и евангелие недели ряд, и праздника. Причастен: Хвалите Господа с небес: Другий, праздника. [Смотри] Прилучившагося же святаго рядоваго в сию неделю службу поем на повечерии, или како настоятель изволит.

[Смотри] указ о празднице сретения господня, аще в кой день сретение будет, или в кой день случится отдание его.

Аще ли случится праздник сретения господня в неделю блуднаго, или в понедельник, или во вторник мясопустныя недели, отдается праздник в пяток тояже недели. Аще ли случится в среду, или четверток, или пяток, или в субботу мясопустныя недели: и отдается во вторник сырныя недели. Аще ли случится в неделю мясопустную, или в понедельник сырныя недели: и отдается в четверток тояже недели. Аще ли случится во вторник, или в среду сыропустныя недели: и отдается в субботу тояже недели. Аще ли случится в четверток сырный, или в пяток, или в субботу: и отдается в неделю сыропустную. Аще ли сретение будет в неделю сыропустную, тогда празднуем един день.

[Смотри] Аще случится отдание сретения господня в неделю фарисееву, или блуднаго, или сыропустную.

На Велицей Вечерни, на Господи воззвах, стихиры воскресны 3, и триоди 3, и праздника, со славным, 4. Слава, триоди: И ныне, богородичен 1–й гласа. Аще ли храм сретения: И ныне, праздника. На литии стихиры праздника, и триоди хвалитныя, кроме славна. Слава, триоди: И ныне, праздника. На стиховне стихиры воскресны. Слава, триоди: И ныне, праздника. На благословении хлебов, тропарь, Богородице Дево, дважды: и праздника единожды. На Бог господь, тропарь воскресн, дважды. Слава, и ныне праздника. По кафисмах седальны воскресны, и богородичны их, и чтение: и поем полиелей. псалом: Хвалите имя господне: и другий псалом: Исповедайтеся господеви: [Смотри] Аще ли неделя блуднаго, или сыропустная. Поем и 3–й псалом: На реках вавилонских: со аллилуиею.