Святой Андрей - [49]

Святителю Андрею, архиепископу Критскому

Тропарь, глас 4

Христову Церковь цевницею языка твоего песнословя умильно, возвеселил еси, богословием же Препетыя Троицы славу всем сказал еси ясно, тем тя яко тайноглагольника поем, Андрее, пастырю Критский, и величаем память твою, Христа славяще, дивнаго во святых Своих.

Кондак, глас 2

Вострубив ясно божественная сладкопения, явился еси светильник мира светлейший, светом сияя Троицы, Андрее преподобие. Темже вси вопием ти: не престай моляся о всех нас.

Благоверному великому князю Андрею Боголюбскому

Тропарь, глас 8

Яко благоверен и праведен, за любовь Христа Бога от своих смерть приял еси, кровь свою пролияв, якоже прежде сродницы твои и страстотерпцы Борис и Глеб, ихже кровем совопиет и твоя кровь, святе, к Богу, якоже Авеля и Захарии праведных, благоверный страстотерпче, великий княже Андрее, с нимиже Христа Бога моли о стране нашей, еже богоугодней быти и сыновом российским спастися.

Ин тропарь, глас 3

Еже во плоти житию твоему удивишася ангельстии чини: како с телом к невидимым сплетением изшел еси, преславне, и уязвил еси демонския полки. Отонудуже, Андрее, Христос тебе воздаде богатыми дарованьми: сего ради, отче, моли спастися душам нашим.

Кондак, глас 8

В мире сем благочестно и праведно пожив, молитвою, милостынею и благостраданием Богу угодил еси, сего ради и Бог по убиении твоем прослави тя нетлением и чудесы, Егоже, святе Андрее, моли сохранити отечество твое и всех людей, благочестно тебе почитающих.

Преподобному Андрею Рублёву

Тропарь, глас 3

Божественнаго света лучами обличаемый, преподобие Андрее, Христа познал еси, Божию Премудрость и силу, и иконою Святыя Троицы всему миру проповедал еси единство во Святей Троице, мы же со удивлением и радостию вопием ти: имеяй дерзновение ко Пресвятей Троице, моли просветити души наша.

Кондак, глас 8

От юности к божественней красоте устремлялся, чудный иконописец в земли Российстей был еси и, богоносным твоим учителем поревновав, сиянием добродетелей украсился еси, преподобие Андрее, темже и явися Церкве нашея похвала и радование.

Преподобным Александру и Андрею

Тропарь, глас 1

Воини христолюбивии, страдальцы послушания прехвальнии, Александре дивный Пересвете и Андрее, Ослябей именуемый, Сергия игумена благодатные наследницы, Куликовской брани ратницы духовнии, вы бо змия агарянскаго победисте, но и нас своим заступлением не остависте. Телами в храме Рождества Богородицы почиваете, душею в превышнем селении пребываете. Молите за весь род русский православный, преподобнии сродницы наши.

Кондак, глас 7

На поле Куликовом агарян победисте и венцами славы увенчастеся, преподобномученицы Александре и Андрее, молите Христа Бога и нам врага рода человеческого побеждати, православие храните и душам нашим велию милость.

Величание

Ублажаем вас, святии преподобномученицы наши Александре и Андрее, и чтим святую память вашу, воинов христолюбивых наставницы и Ангелов собеседницы.

Блаженному Андрею Симбирскому

Тропарь, глас 1

Глас апостола Твоего Павла услышав, глаголющ: мы юроди Христа ради, раб Твой, Христе Боже, Андрее, юрод бысть на земли Тебе ради; темже память его почитающе, Тебе молим, Господи, спаси души наша.

Кондак, глас 8

Вышния красоты желая, и нижния сласти телесныя тошно оставил еси, нестяжанием суетнаго мира ангельское житие проходя, скончався, Андрее блаженне; с нимиже Христа Бога моли непрестанно о всех нас.

Блаженному Андрею Тотемскому

Тропарь, глас 4

Терпением и мужеством Христа ради юродство восприял еси, блаженне Андрее, в посте и бдении пребывая, тягость зноя летняго понесл еси, и мразы зимния терпя, темже и ныне приходящим с верою к тебе исцеление неоскудно подаеши, моли Христа Бога спастися душам нашим.

Кондак, глас 8

Вышния красоты желая, и нижния сласти телесныя тошно оставил еси нестяжанием суетнаго мира, ангельское житие преходя, скончався, Андрее блаженне, с нимиже Христа Бога моли непрестанно о всех нас.

Литература

Жития святых на русском языке, изложенные по руководству Четьих Миней святителя Димитрия Ростовского. М.: Сибирская Благозвонница, 2011.

Библейская энциклопедия Брокгауза. Paderborn, 1999.

Игумен Дамаскин (Орловский). Жития новомучеников и исповедников Российских XX века. Февраль. Тверь, 2005. С. 169–171.

Игумен Дамаскин (Орловский). Жития новомучеников и исповедников Российских XX века. Февраль. Тверь, 2005. С. 108–110.

Игумен Дамаскин (Орловский). Жития новомучеников и исповедников Российских XX века. Май. Тверь, 2007. С. 268–271.

Игумен Дамаскин (Орловский). Жития новомучеников и исповедников Церкви Русской. Июль. Ч. 1. Тверь, 2016. С. 482–484.

Игумен Дамаскин (Орловский). Мученики, исповедники и подвижники благочестия Русской Православной Церкви XX столетия.

Жизнеописания и материалы к ним. Книга 3. Тверь, 2001. С. 232–236.

Игумен Дамаскин (Орловский). Мученики, исповедники и подвижники благочестия Русской Православной Церкви XX столетия. Жизнеописания и материалы к ним. Книга 5. Тверь: Булат, 2001. С. 313–320.

Игумен Дамаскин (Орловский). Жития новомучеников и исповедников Российских XX века. Тверь, 2005. С. 321–325.

Игумен Дамаскин (Орловский).