Единоверческие молитвы - [32]

Слава, и ныне, без Аллилуии.

Таже, исповедание православныя веры. Верую во единаго Бога. Трисвятое. И по Отче наш.

Тропари сия, глас 8:

Се Жених грядет в полунощи, и блажен раб, его же обрящет бдяща. Недостоин же паки, его же обрящет ленящася. Блюди убо душе моя, да не сном отяготишися и да не смерти предана будеши, и царствия вне затворишися, но воспряни зовущи: свят, свят, свят еси, Боже, Богородицы ради, помилуй нас.

Слава. День он страшныи помышляющи, душе моя побди, вжигающи свещу свою, и маслом просвещающи, не веси бо когда приидет к тебе глас глаголющии: се Жених. Блюди убо, душе моя, да не воздремлеши, и пребудеши вне толкущи, яко пять дев; но бодрено побди, яко да усрящеши Христа милостива, и даст ти чертог божественыя славы Своея.

И ныне. Тебе необоримую стену имуще вернии, и спасения утвержение, Богородице Дево молим: сопротивных советы разори и людей Своих печаль на радость преложи. Мир Свой умири и православных утверди, и о смирении мира молися, яко Ты еси Богородице, упование наше. Господи помилуй (40).

Таже молитва Великаго Василия: Иже на всяко время, и на всяк час, на небеси и на земли, покланяемыи и славимыи, Боже Благии, долготерпеливе и многомилостиве; Иже праведники любя и грешных милуя; Иже всех зовыи ко спасению, обещания ради будущих благ; сам Господи, приими молитвы наша в час сий, и в благости исправи живот наш, к заповедем Твоим. Душа наша освяти, и телеса очисти, помышления исправи, и мысли очисти, разум уцеломудри и истрезви, и избави нас от всякия скорби, зол и болезней, и душевных страстей, и огради нас святыми ангелы Твоими, яко да ополчением их соблюдаеми и наставляеми, достигнем во единство веры, и в разум неприкосновенныя Ти славы, яко благословен еси во веки, аминь.

Таже, Господи помилуй (трижды). Слава, и ныне.

Честнейшую херувим, и славнейшую воистину серафим, без истления Бога Слова рождьшую, сущую Богородицу Тя величаем (поклон). Именем Господним благослови, отче. За молитв святых отец наших, Господи Исусе Христе, Сыне Божии, помилуй нас. Аминь.

Аще есть пост, или кроме поста, егда поем Аллилуия, и творим три поклоны великия, глаголюще молитву святаго Ефрема. Господи и Владыко животу моему, дух уныния, небрежения, сребролюбия и празднословия, отжени от мене (поклон). Дух же целомудрия, смирения, терпения и любве, даруй ми рабу Твоему (поклон). Ей, Господи Царю, даждь ми зрети моя согрешения, и еже не осуждати брата моего, яко благословен еси во веки, аминь (поклон).

И прочих поклонов 12, глаголюще в себе: Господи Исусе Христе, Сыне Божии, помилуй мя грешнаго (дважды с поклонами).

Боже, милостив буди мне грешному (поклон).

Боже, очисти грехи моя и помилуй мя (поклон).

Создавыи мя Господи, помилуй (поклон).

Без числа согреших Господи, прости мя (поклон).

И паки скончав поклоны, глаголем молитву всю выше писаную: Господи, и Владыко животу моему… И поклон един.

И по изглаголании молитвы, или по Честнейшую херувим, глаголем сию молитву Великаго Василия: Владыко Боже, Отче Вседержителю, и Господи Сыне Единородныи Исусе Христе, и Святыи Душе, едино Божество, и едина сила, помилуй мя грешнаго, и ими же веси судьбами, спаси мя недостойнаго раба Твоего, яко благословен еси во веки, аминь.

Таже, Приидите, поклонимся (трижды). И поклоны три.

Псалом 120.

Возведох очи мои в горы, отнюдуже приидет помощь моя. Помощь моя от Господа, сотворшаго небо и землю. Не даждь во смятение ноги твоея, ниже воздремлет храняи тя. Се не воздремлет, ни уснет храняи Израиля. Господь сохранит тя, Господь покров Твой на руку десную твою. Во дни солнце не ожжет тебе, ни луна нощию, Господь сохранит тя от всякаго зла, сохранит душу твою Господь. Господь сохранит вхождение твое, и исхождение твое от ныне и до века.

Псалом 133.

Се ныне благословите Господа вси раби Господни, стоящии в храме Господни, во дворех дому Бога нашего. В нощех воздежите руки ваша во святая, и благословите Господа. Благословит тя Господь от Сиона, сотворивыи небо и землю.

Слава, и ныне. Трисвятое, и поклоны три. По Отче наш, тропари сия: Помяни Господи, яко благ, рабы Своя, и елика в житии сем согрешиша, прости. Никтоже бо без греха, токмо Ты могии преставленым дати покой. Иже глубинами мудрости, человеколюбне вся строя, и еже на пользу всем подавая, едине Содетелю, покой Господи, душа усопших раб Своих, на Тя бо упование возложиша, Творца и Зиждителя и Бога нашего.

Слава. Со святыми покой, Христе, душа раб Своих, идеже несть болезни, ни печали, ни воздыхания, но жизнь вечная.

И ныне, богородичен: Блажим, Тя вси роди, Богородице Дево, в Тя бо невместимыи Христос Бог наш, вместитися изволи, блажени есмы и мы помощницу Тя имуще, день бо и нощь молишися о нас, и державы царствия Твоими молитвами утвержаются. Тем благодаряще вопием Ти: радуися, Обрадованная, Господь с Тобою.

Господи помилуй (12).

Таже, молитву сию: Помяни Господи, иже в надежи воскресения, и жизни вечныя, усопшия отцы и братию нашу, и всех иже во благочестивей вере скончавшихся, и прости им всяко согрешение, вольное же и невольное, словом и делом, и помышлением согрешенное ими и всели их в места светла, в места прохладна, в места покойна, отнюдуже отбеже всяка болезнь, и печаль и воздыхание, идеже присещает свет лица Твоего, и веселит вся иже от века святыя Твоя. И даруй им царствие Твое, и причастие неизреченных и вечных Твоих благ, и Твоея безконечныя, и блаженныя жизни наслаждение. Ты бо еси воскресение и живот и покой усопшим рабом Твоим, Христе Боже наш, и Тебе славу возсылаем, со безначальным Ти Отцем, и с Пресвятым и Благим и Животворящим Ти Духом, ныне и присно и во веки веком, аминь.