Единоверческие молитвы - [20]

Посем: Слава, и ныне.

Аллилуия, Аллилуия, слава Тебе, Боже (трижды и поклоны три).

Господи помилуй (трижды). Слава, и ныне.

Таже, песнь святаго пророка Исаии.

С нами Бог, разумейте языцы и покаряйтеся, яко с нами Бог.

Услышите и до последних земли, яко с нами Бог. Могущии покаряйтеся, яко с нами Бог. Аще бо паки возможете, и паки побеждени будете, яко с нами Бог. И иже аще совет совещаваете, и разорит и Господь, яко с нами Бог. И слово еже аще возглаголете, не имать пребывати в вас, яко с нами Бог. Страха же вашего не имам убоятися, ниже соблазнитися, яко с нами Бог. Господа же Бога нашего святите, и Той будет вам в боязнь, яко с нами Бог. И иже аще Нань надеешися, и Той будет ти во освящение, яко с нами Бог. И уповающе будем Нань, и спасемся Его ради, яко с нами Бог. Се аз и дети, яже ми дал Бог, яко с нами Бог. Людие ходящии во тме, видеша свет велии, яко с нами Бог. Живущии во стране и сени смертней, свет восияет на вы, яко с нами Бог. Яко Отроча родися нам, Сын и дастся нам, яко с нами Бог. Ему же власть бысть на раме Его, яко с нами Бог. И миру Его несть предела, яко с нами Бог. И нарицается имя Его велика совета Ангел, яко с нами Бог. Чуден Советник, яко с нами Бог. Бог крепок, Владыка, Князь смирения, яко с нами Бог. Отец будущаго века, яко с нами Бог.

Слава: Яко с нами Бог.

И ныне: Яко с нами Бог.

Таже, сей стих глаголем трижды: С нами Бог, разумейте языцы и покаряйтеся, яко с нами Бог.

Таже: День пребыв благодарю Тя Господи, вечер молюся с нощию, безнаветие подаждь ми Спасе, и спаси мя.

Слава. День изшед славословлю Тя Владыко, вечер молюся с нощию, безсоблазньство подаждь ми Спасе, и спаси мя.

И ныне. День прешед песнословя Тя Святыи, вечер молюся с нощию, без греха сохрани мя Спасе, и спаси мя.

Безплотное естество херувимское, немолчными песньми Тя славословят, шестокрыльная и животная серафим, непрестанными гласы Тя превозносят, ангельская же вся воинства, трисвятыми песньми Тя восхваляют. Прежде бо всех еси сыи Отец, и собезначальна имаши Своего Сына, и равночестен нося Дух жизни, Троицу являеши нераздельну.

Пресвятая Дево, Мати Божия, и иже Слову самовидцы и слуги, пророк же и мученик, и вси ликове, яко безсмертну имуще жизнь, о всех молитеся прилежно, яко вси есмы в бедах, да льсти избавльшеся лукаваго, ангельскую вопием песнь: Святыи, Святыи, Святыи, Трисвятыи Господи, помилуй и спаси нас.

Таже, исповедание православныя веры, перваго Собора:

Верую во единаго Бога Отца, Вседержителя, Творца небу и земли, видимым же всем и невидимым. И во единаго Господа Исуса Христа, Сына Божия, Единороднаго, Иже от Отца рожденнаго прежде всех век. Света от света, Бога истинна от Бога истинна, рожденна, а не сотворена, единосущна Отцу, Им же вся быша. Нас ради человек, и нашего ради спасения, сшедшаго с небес, и воплотившагося от Духа Свята, и Марии Девы вочеловечьшася. Распятаго за ни при понтийстем Пилате, страдавша и погребена, и воскресшаго в третий день по писаниих. И возшедшаго на небеса, и седяща одесную Отца. И паки грядущаго со славою, судити живым и мертвым, Его же царствию несть конца.

Втораго Собора: И в Духа Святаго, Господа истиннаго и животворящаго, Иже от Отца исходящаго, Иже со Отцем и Сыном спокланяема и сславима, глаголавшаго пророки. И во едину святую соборную и апостольскую Церковь. Исповедую едино Крещение, во оставление грехов. Чаю воскресения мертвым. И жизни будущаго века, аминь.

Посем глаголет, начинаяи лик:

О! Пресвятая Госпоже Владычице Богородице Всемилостивая, моли Бога о нас грешных.

И творим метание на кииждо стих. И другии лик той же стих глаголет. Наченыи же глаголет:

Вся небесныя силы, святии ангели и архангели, молите Бога о нас грешных.

Святыи великии Иоанне пророче и Предотече, Крестителю Господень, моли Бога о нас грешных.

Святии славнии апостоли, пророцы и мученицы, и вси святии, молите Бога о нас грешных.

Преподобнии и богоноснии отцы наши, пастырие и учителие вселенней, молите Бога о нас грешных.

Зде рцы святаго, его же есть храм.

Непобедимая и божественная сила, честнаго и животворящаго Креста Господня, не остави нас грешных, уповающих на Тя.

Боже, милостив буди нам грешным.

Егда же достигнем сего стиха: Боже, очисти грехи наша, и помилуй нас, глаголем его трижды.

Посем, Трисвятое, и поклоны обычныя (3).

По Отче наш. Молитва Исусова.

В понедельник и среду вечер, тропари сия глас 2.

Просвети очи мои Христе Боже, да некогда усну в смерть, да некогда речет враг мой: укрепихся нань.

Стих. Призри и услыши мя, Господи Боже мой.

Паки той же тропарь: Просвети очи мои Христе Боже, да некогда усну в смерть, да некогда речет враг мой: укрепихся нань.

Слава. Заступник души моей буди Боже, яко посреде хожду сетей многих. Избави мя от них, и спаси мя Блаже, яко Человеколюбец.

И ныне, Богородичен. Яко не имамы дерзновения, за премногия грехи наша, но Ты, Иже от Тебе рождьшагося, моли Богородице Дево. Много бо может молитва Матерня, на умоление Владыки. Не презри грешных мольбы Всечистая, яко милостив есть, и спасти могии, Иже страдати нас ради изволивыи.

Ины тропари, во вторник и в четверток вечер, глас 8.

Сия обои тропари пременяти чрез день.