Духовная культура средневековой Руси - [146]
л. 179 об. или ото умножениа скота подаст, // яко же Аврааму и Иеву и инем праведником, но не на сокровение же или на величание и на гордость, но того ради, яко приим помилование от Бога, и не пощадите же расточити убогим любве ради Христовы, а не погибнет во аде, яко богатый он, пред него же враты нищий Лазарь лежаще. О таковых бо Ияков брат Господень по плоти написа: «Да хвалит же ся брат смиренный в высоте своей, богатый же в смирении своем, зане яко цвет травный мимо идет. Восиа бо солнце со зноем и усше трава и цвет ея отпаде и благолепие лица ее погибе, тако и богатый в хожении своем увядает. Блажен муж, иже претерпит искушение, яко искушен быв приимет венец жизни, иже обеща Господь любящим Его»[802]. И паки рече: «Не Бог ли избра нищая мира, богаты в вере и наследники царствия, иже обеща Господь любящим Его»[803]. Яко же бо Сам Господь рече учеником Своим: «и не глаголю вам, яко аз умолю Отца о вас, Сам бо Отец любит
л. 180 вы, яко вы Мене возлю // бисте»[804]. Сие же вся сведый Господь рече сего ради, яко святии ученицы Его ради постражут и человек ради, их же душа спасут, ибо и сии многи пакости сотвориша им, елицы последи пришед в чювство разумеша, яко апостоли хотяще им жизни вечныя и от них же страдаша, свершающе Господню заповедь, еже о любви, яко положити душу за други своя. Сии бо не мняху яко бысть древний друг, но мняще яко ныне и враг, но друг будет по вере. Господь бо наказая их, рече: «любите враги ваши, благословите кленущая вы, добро творите ненавидящим вас, молите за творящая вам напасть и изгонящая вы, яко да будете сынове Отца вашего, иже есть на небесех»[805]. Се бо слово и всем верным в заповедех Его ходящим образ даст Господь, яже Сам на кресте рече: «Отче, отпусти им, не ведят бо что творят»[806]. Вся бо сведый Господь, аще и Сам не имеяй греха, но образ дая, яже вся напаствуемая терпети добро есть, сего ради повеле любити враги, яко враг лутши друга л. 180 об. есть. Друг бо по твоему нраву хотя плотскому // твоему естеству благо творити, враг же томлением тела твоего душу твою пресветле очищает, яко оба ти к пользе суть друг убо к телесному естеству, враг же к пользе к душевному свойству. Сего ради Господь вся равно повеле любити, яко же друга, тако и врага. Не свершен бо враг всякий человек, аще и телу зрится враг, души же целитель есть. Сего ради никако же достоит враждовати, токмо на невидимаго врага Миродержителя. Се бо есть истинный враг, еже хотяй и душу и тело в муку некончаемую вовлещи. Сего убо подобает дел ненавидети и братися с ними. Яко бо кто пребываяй в делех его, в нем пребывает[807] — ив себе место Ему сотворяет[808]. О горе тако быти, сего бо дела не от существа суть, но от неправды, ложь бо есть, якоже и Господь рече о нем. Ложь бо толкуется, еже преже не бысть но еже не сущее сложити, сие и оное и глаголати
л. 181 бысть, еже убо не бысть, или не к своему трудотво // рению прилагатися и чюжая восхитати — се есть ложь, есть бо се от сатаны, яко восхоте на Божии сотворении, на облаце, поставити престол и приложитися вышнему и сими погибе. Убо есть ложь сложение, еже несущество, того ради нарицается блядство. Добро же есть сего отбегати и пребывати во Господних заповедех, еже есть в любви, сею бо вся заповеди Господня исправятся. Любовь же есть истинна, еже земных богатеств нестяжание, не сих бо осужая глаголю, елицы земных стяжание требуют, но сих похваляя, елицы стяжаниа не желают, но нестяжание хвалят, яко бо сие ни у кого же ничесо же не нудит восхитити и не сотворит никого же жалящися на тя. Добро убо есть в таковых пребывати, се бо есть Господня воля. Аще ли же кто собирати от чюжих трудов не останется и глаголеть: «аще и богатею, а любовь творю», се ложь есть, невозможно бо обоего сего творити. Егда бо прииде ко Господу некий и рече ему: л. 181 об. «Учителю благий, что благо сотворю да имам живот // вечный»?
Господь же рече ему: «что мя глаголеши блага, никто же благ, токмо един Бог»[809]. Сего бо ради Господь тако рече, понеже он блага учителя нарицашей и не вероваше, яко Бог есть. Господь же поведа ему, яко благ есть и яко Бог есть и рече ему: «аще хощеши внити в живот, соблюди заповеди». Глагола ему: «киа?». Исус же рече: «еже не убиеши, не прелюбы сотвориши, не украдеши, не лжесвидетельствуеши, чти отца и матерь и возлюбиши искренняго своего яко сам себе». Глагола ему юноша: «вся сих сохраних от юности моея и что есмь еще не докончал?» Рече же ему Господь: «аще хощеши свершен быти, иди продаждь имение свое и даждь нищим и имети имаши сокровище на небеси и гряди вслед Мене». Слышав же юноша слово, отиде скорбя, бе бо имея стяжания многа. Господь же рече учеником своим: «аминь глаголю вам, яко неудобь богатый внидет во царство небесное, удобие бо есть велбуду
л. 182 всквозе иглини уши проити, // неже богату во царство Божие внитти»[810].
О сем бо златоглаголивый Иоанн глаголет в толковании своем: «яко вся си заповеди менши есть любви, но подручны суть ей». Господь бо о всех заповедех воспросив, таже глагола ему: возлюбиши искренняго своего, яко сам себе. Он же отвеща: вся си сохраних еще от юности. Се убо слово ложь глаголя, яко аще бы любил искренняго своего, яко сам себе, не бы убо был богат, много бо искренних в низщете, и аще бы их любил яко себе, убо раздаял бы им все богатество и был бы с ними равен в низщете. Сего бо ради Господь изъявляя неисправленное слово Его рече: аще хощеши совершен быти, иди и продажд имение свое и даждь нищим. Он же сего ради оскорбе, яко не любляше тем отдати своего богатества, их же рек любляше яко себе. Се убо он изъяви, еже не тако любляше искренняго яко себе. Сего ради рече Господь: яко неудобь богатый внидет во царство небесное. О таковых бо и Ияков брат л. 182 об. Господень по плоти пиша глаголет: «Богатии плачитесь рыдающе // о страстех ваших грядущих на вы, богатество ваше изгни и ризы ваша молиа поядоша, злато ваше и срёбро изржаве и ржа их в послушество вам будет»
